Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 251 Hüküm no: 260 Orijinal metin no: [34b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bakkal Polizu v. Yani’nin, Mumcu Panayot v. Dimitri’ye açtığı alacak davasında haksız bulunduğu Ma‘rûz Sahib-i arzuhâl Bakkāl Polizu v. Yani nâm zimmî meclis-i şer‘-i enverde Yedikule mumcularından derûn-ı arzuhâlde mezkûr Panayot v. Dimitri zimmî muvâcehesinde merkūm Panayot zimmî târih-i i‘lâmdan üç ay mukaddem malımdan ve yedimden iştirâ ve kabz eylediği seksen guruş ve yirmi paralık revgan-ı zeytin semen-i mezkûrunu vermeyip zimmetinde kalmağla taleb ederim deyü ba‘de’d-da‘vâ ve’s-suâl merkūm Panayot zimmî cevâbında fi’l-vâki‘ müdde‘î-i mesfûrdan ol mikdâr revgan-ı zeyt iştirâsını ikrâr lâkin semen-i mezkûrunu târih-i i‘lâmdan elli üç gün mukaddem müdde‘î-i merkūm Bakkāl Polizu zimmîye altın ve beyaz akçe mahlûten tamamen edâ ve teslîm ol dahi yedimden ahz u kabz edip ve ber-vech-i muharrer yedimden ahz edip târih-i mezkûra gelince revgan-ı zeyt semeninden zimmetimde nesne hakkı kalmadığını alâ-re’si’l-işhâd ikrâr ve işhâd dahi etmişidi deyü ba‘de’d-def‘ ve’l-inkâr müdde‘î-i mezkûr def‘-i meşrûhunu ahrâr-ı ricâl-i Müslimînden Yiğitbaşı Ali Hoca b. Hüseyin ile ahrâr-ı ricâl-i ehl-i zimmetden Mumcu Kosta v. Yorgi zimmî şehâdetleriyle mesfûr Polizu zimmî muvâcehesinde vech-i şer‘î üzere ba‘de’l-isbât ve’t-ta‘dîl ve’l-kabûl mûcebiyle hükmolunup müdde‘î-i mesfûr Polizu zimmî da‘vâ-yı mezkûresiyle merkūm Panayot zimmîye bî-vech mu‘ârazadan men‘ olunduğu huzûr-ı âlîlerine i‘lâm olundu. Fî 13 Recebi’l-ferd sene 1162