Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 538 Hüküm no: 656 Orijinal metin no: [89b-6] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Eski kocası Abdurrahman’ın Şerife Habibe Hatun’dan aldığı eşyaları geri vermesi İslâmbol’da el-Hâc Pîrî mahallesinde sâkine ve zâtı mu‘arrefe Şerife Habibe Hatun bt. Ali Davudpaşa Mahkemesi’nde meclis-i şer‘de zevc-i sâbıkı es-Seyyid Abdurrahman b. Musa mahzarında mezbûr es-Seyyid Abdurrahman ile mukaddemâ zevciyet beynimizde kāime iken yedimde mâlım ve mülküm olan mecmû‘u yüz yirmi guruş kıymetli bir elmas taşlı gerdâniye ve bir altın yüzük ve bir çuka ferâcemi ahz ü kabz edip zikr olunan altın yüzük ve ferâceyi on beş buçuk guruş semen-i medfû‘ ve makbûza âhara bey‘le istihlâk ve gerdâniye-i mezkûrenin aynı hâlâ yedinde mevcûd olmağla zikr olunan yüzük ve ferâcenin kıymet-i mezkûreleri olan meblağ-ı mezbûr on beş buçuk guruş ile gerdâniye-i mezkûreyi mezbûr es-Seyyid Abdurrahman’dan taleb ederim deyü ba‘de’d-da‘vâ ve’l-istintâk ve’l-ikrâr alâ-mûcebi ikrârihî meblağ-ı mezbûr on beş buçuk guruşu müdde‘iye-i mezbûre Şerife Habibe Hatun’a edâ ve gerdâniye-i mezkûreyi dahi red ve teslîme mezbûr es-Seyyid Abdurrahman’a tenbîh olunduğu bi’l-iltimâs huzûr-ı âlîlerine i‘lâm olundu. Fî 11 S sene 1197