Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 572 Hüküm no: 729 Orijinal metin no: [94b-7] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Denizabdal mahallesinde Mehmed Emin’in evinin bir odasında kiracı olarak oturan Mustafa b. Ahmed’in odayı sahibine lâzım olması sebebiyle tahliye etmesi İslâmbol’da Deniz Abdal mahallesinde sâkin sâhib-i arzuhâl Mehmed Emin b. Ali nâm kimesne Davudpaşa Mahkemesi’nde meclis-i şer‘de derûn-ı arzuhâlde mezkûrü’l-ism Mustafa b. Ahmed nâm kimesne mahzarında mezbûr Mustafa mahalle-i mezbûrede vâki‘ taht-ı tasarrufumda olan bir bâb vakıf menzilimin bir odasında beher şehr birer guruş ücret tesmiyesiyle müstecirim olup lâkin zikr olunan odanın bana lüzûmu olmağla beynimizde olan akd-i icâreyi fesh birle zikr olunan odayı tahliye ve bana teslîme mezbûr Mustafa’ya tenbîh olunmak murâdımdır deyü ba‘de’d-da‘vâ ve’l-istintâk ve’l-ikrâr mûcebince zikr olunan odayı târih-i i‘lâm şehri gāyetinde müdde‘î-i mezbûra teslîme mezbûr Mustafa’ya ba‘de’t-tenbîh mezbûr Mustafa dahi şehr-i merkūm gāyetinde oda-i mezkûrdan çıkıp âhar mahalleye nakletmek üzere ta‘ahhüd eylediği bi’l-iltimâs huzûr-ı âlîlerine i‘lâm olundu. Fî 26 min-Ca sene 1197