Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 276 Hüküm no: 218 Orijinal metin no: [71a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kiracısı olduğu vakıf evi mütevelli izniyle tamir ettiren Mehmed Bey’in ne kadar masraf yaptığının tespiti Mahmiye-i İstanbul’da Haremeyn-i Şerîfeyn Vakfı’ndan Nurlu Dede mahallesinde vâki‘ lede’l-cîrân ma‘lûmü’l-hudûd menzilin icâre-i mu‘accele ve icâre-i müeccele ile hâlâ müste’ciri olan bâ‘isü’l-kitâb fahrü’l-akrân Mehmed Bey b. Abdülmennan meclis-i şer‘de evkāf-ı mezbûreye bi’l-fi‘il mütevellî olan el-Hâc Hasan Bey b. Mehmed mahzarında ikrâr ve takrîr-i kelâm edip bundan akdem menzil-i mezbûrun câ be-câ bazı mevâzi‘i harâba müşrif olup meremmâta muhtâc oldukda kendi mâlımla ta‘mîr edip ba‘dehû icâre-i mu‘acceleme kıymeti icâre-i müecceleme izn-i şer‘ ve ma‘rifet-i mütevellî-i mezbûr ile meremmât etmişidim. Hâlâ kıbel-i şer‘den üzerine varılıp ne mikdâr akçeye tahammülü vardır keşf ve tahrîr olunması matlûbumdur dedikde savb-ı şer‘den Mevlânâ Hüseyin Efendi b. ( ) ve Hâssa Mi‘mârlarından üstâd Ali b. Halil irsâl olunup zeyl-i kitâbda mastûretü’l-esâmî olan Müslimîn ile mahall-i mezbûra vâki‘ hâl mütevellî-i merkūm mahzarında keşf olundukda fi’l-hakīka menzil-i mesfûr ta‘mîr olunmuş bulup bu cümleye sarf olunan kerestenin cem‘an ba‘de külli’l-hesâb doksan iki bin beş yüz akçeye tahammülü vardır mi‘mâr-ı mersûm ve sâir ehl-i vukūf Müslimîn ittifâk eylediklerini mevlânâ-yı mezbûr mahallinde tahrîr edip ba‘dehû meclis-i şer‘a gelip haber vermeğin mâ-vaka‘a isre’t-taleb sebt olundu. Fî-evâhiri Rebî‘i’l-evvel min-şühûri sene seb‘a ve ışrîn ve elf. Şühûdü’l-hâl: Abdurrahman Bey b. ( ) el-bevvâb, İbrahim Bey b. Abd el-bevvâb, Mustafa Bey b. ( ), Keyvan b. Abd, Ali b. Süleyman, Hüseyin b. Mehmed ve gayruhüm mine’l-huzzâr.