Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 282 Hüküm no: 226 Orijinal metin no: [73a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yoros’un Dereseki köyünde Veli Müderris tarafından vakfedilen bahçenin yerinde tespiti Mahmiye-i İstanbul’da Haremeyn-i Şerîfeyn Evkāfı’na bi’l-fi‘il mütevellî olan Hamza Bey b. ( ) nâm bevvâb-ı sultânî meclis-i şer‘de takrîr-i kelâm edip Yoros kazâsına tâbi‘ Akbaba -kuddise sırrahû- civârında Dereseki nâm karye sâkinlerinden Veli Müderris demekle ma‘rûf kimesne karye-i mezbûrede vâki‘ bir cânibi Sultan Hatun mülkü ve bir cânibi dağa ve iki tarafı tarîk-i âmma müntehî ve mahdûd olan mülk bahçesini bundan esbak hâl-i sıhhatinde evvelen kendi nefsine ba‘dehû fukarâ-i Haremeyn’e vakf ve şart ve ta‘yîn eylemiş hâlâ ber-mûceb-i şart-ı vâkıf-ı mezbûr zikr olunan bahçe fukarâ-i Haremeyn-i muhteremeyne âid olmuşdur kıbel-i şer‘den üzerine varılıp vâki‘ hâl ahâlî-yi karye-i mezbûreden tefahhus ve istihbâr olundukdan sonra fukarâ-i mezbûrîn için zabt ettirilmesini taleb ederim dedikde savb-ı şer‘den Mevlânâ Hüseyin Efendi ve Hâssa mi‘mârlarından Üstâd Ali b. Halil irsâl olunup zeyl-i kitâbda esâmîsi mastûr olan Müslimîn ile karye-i mezbûreye varılıp vâki‘ hâl ahâlî-yi mezbûreden tefahhus ve istihbâr olundukda karye-i mezbûre sâkinlerinden Mehmed b. Eyüb el-imâm ve Kalender b. Mehmed ve Mahmud b. Mehmed ve Mustafa b. Mehmed ve Ahmed b. Mehmed ve Şaban b. Halil ve Abdülgani b. ( ), ve Ahmed b. Halil ve Mahmud b. Halil ve sâirleri zikr olunan bahçeyi bi-cümleti’t-tevâbi‘ ve’l-hudûd vâkıf-ı mûmâ-ileyh Veli Müderris kendinden sonra fukarâ-i mezbûrîne vakf ve şart etmişdir deyu mütevellî-i merkūm mahzarında alâ-tarîki’ş-şehâde haber verdiklerini mevlânâ-yı mezbûr mahallinde vukū‘u üzere tahrîr edip ba‘dehû meclis-i şer‘a gelip inhâ etmeğin mûcebince bahçe-i merkūmeyi fukarâ-i mezbûrîn için zabta mütevellî-i merkūm a tenbîh olunup mâ-vaka‘a kayd olundu. Fî-evâsıtı Şevvâli’l-mükerrem min-şühûri sene seb‘a ve ışrîn ve elf el-hicriyye. Şühûdü’l-hâl: Muslu Çelebi b. Kasım el-kâtib, Hüseyin Çelebi b. Ömer el-müezzin, kıdvetü’l-a‘yân Selim Efendi b. ( ) el-mütevellî-i evkāf-ı Süleymâniye, Mustafa Efendi b. ( ) el-müderris, Ahmed Çelebi b. ( ), Yusuf Çelebi b. ( ) el-kâtib ve gayruhüm.