Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 315 Hüküm no: 266 Orijinal metin no: [83a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Haremeyn Vakfı’ndan Caferağa mahallesinde olan vakıf evin kiracısı Mehmed Beşe b. Abdullah tarafından tamir için yapılan masrafın tespiti Mahmiye-i İstanbul’da Ca‘fer Ağa mahallesinde vâki‘ Haremeyn-i Muhteremeyn Evkāfı’ndan olup beyne’l-ahâlî ve’l-cîrân ma‘lûmü’l-hudûd büyût-ı müte‘addideyi muhtevî menzilin icâre-i mu‘accele ve müeccele ile müste’ciri olan işbu râfi‘ü’l-kitâb Mehmed Beşe b. Abdullah nâm râcil meclis-i şer‘-i hatîr-i lâzımü’t-tevkīrde takrîr-i kelâm ve ta‘bîr-i mâ-hüve’l-merâm edip menzil-i mezbûrun bazı mevâzi‘i bi’l-külliye ve bazı mevâzi‘i câ be-câ harâba müşrif ta‘mîre muhtâc oldukda bundan akdem izn-i şer‘ ve ma‘rifet-i mütevellî-i vakf-ı mezbûr ile icâre-i mu‘acceleme mahsûb olmak üzere kendi mâlımdan imâret ve meremmet etmişidim. Hâlâ kıbel-i şer‘den üzerine varılıp ne mikdâr akçeye tahammülü vardır keşf ve tahrîr olunması matlûbumdur dedikde savb-ı şer‘den Mevlânâ Hasan b. Osman el-müderris ve Hâssa mi‘mârlardan Üstâd Ali b. Halil irsâl olunup zeyl-i kitâbda mastûretü’l-esâmî olan Müslimîn ile mahall-i mezbûra varılıp vâki‘ hâl vakf-ı mezbûr mütevellîsi Veli Bey b. Abdülmennan nâm bevvâb-ı sultânî mahzarında keşf ve tahrîr olundukda fi’l-hakīka menzil-i mezbûrun tûlen ve arzen hesâb-ı şatrancî üzere beş yüz kırk zirâ‘ tahta havlusu ve bahçe tarafında tûlen ve kadden hesâb-ı mezbûr üzere yirmi dört zirâ‘ dolma duvarı ve menzil-i mezkûrun havlu kapısı tarafında tahtânî menzilin ocağı ve üzerinin tahta döşemesi müceddeden ve bazı mevâzi‘i câ be-câ imâret ve meremmet olunmuş bulunmağın mevâzi‘-i merkūmenin mecmû‘una sarf ve harc olunan kereste-i mütenevvi‘anın üstâdiyye ve ırgadiyye ve neccâriyye ve hammâliyesiyle cem‘an ba‘de külli’l-hesâb dokuz bin akçeye tahammülü vardır deyu mi‘mâr-ı mezbûr ve sâir ehl-i vukūf Müslimîn tahmîn-i sahîh ile tahmîn edip ittifâk ettiklerini mevlânâ-yı mezbûr mahallinde vukū‘u üzere tahrîr edip ba‘dehû meclis-i şer‘a gelip haber vermeğin mâ-vaka‘a bi’t-taleb sebt olundu. Fî-evâhiri şehri Zilhicceti’ş-şerîfe li-sene tis‘a ve ışrîn ve elf. Şühûdü’l-hâl: Mehmed Efendi b. ( ) el-imâm, el-Hâc İbrahim Efendi b. ( ) el-müezzin, Hasan Çelebi b. ( ), Usta Ali b. Hızır, Hızır Çelebi b. İlyas, Üstâd Ali b. ( ) el-hayyât, Receb b. Abdullah ve gayruhüm.