Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 595 Hüküm no: 537 Orijinal metin no: [174b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fetehnâ Hatun’un feragat ettiği vakıf evin Behram Subaşı b. Şaban’a kiraya verilmesi Haremeyn-i Şerîfeyn Evkāfı’na bi’l-fi‘il mütevellî olan fahrü’l-akrân İsmail Çelebi b. Mehmed meclis-i şer‘-i şerîf-i enverde bâ‘isü hâze’l-kitâb zahrü’l-akrân Behram Subaşı b. Şa‘ban mahzarında ikrâr u i‘tirâf edip mahmiye-i İstanbul’da İskender Paşa mahallesinde sâkine iken fevt olan merhûme el-Hâcce Emine Hatun bt. Mehmed hâl-i hayâtında mahalle-i mezbûrede vâki‘ bir tarafı Mehmed Ağa mülkü ve bir tarafı Mustafa Ağa mülkü ve bir tarafı mezbûr Behram Subaşı mülkü ve bir tarafı tarîk-i âm ile mahdûd olup bennâ zirâ‘ıyla tûlen elli yedi ve arzen yirmi iki bi-hesâb-ı şatrancî bin iki yüz elli dört zirâ‘ arsa üzerine mebnî iki beyt-i ulvî ve iki beyt-i suflî ve iki sofa ve dahlîz ve bi’r-i mâ ve ahır ve iki tarafında iki kıt‘a hadîkayı müştemil menzilini vakf edip süknâsını evvelâ li-ebeveyn kız karındaşı Fetehnâ Hatun’a ba‘dehâ Medîne-i Münevvere fukarâsına şart edip mezbûre Fetehnâ ber-vech-i meşrûtiyet mutasarrıfe iken menzil-i mezbûr harâba müşrif olup meremmete kudreti olmamağın hakk-ı süknâsını evkāf-ı mezbûreye fâriğa olup icâre-i mu‘accele ve müeccele ile îcâr vakfa enfa‘ olmağın ba‘de’l-müzâyede ve inkıtâ‘ü’r-rağbe mezbûr Behram Subaşı üzerinde yevmî iki akçe icâre-i müeccele ile on beş bin akçede karâr edip ziyâde ile tâlib bulunmamağın tevliyyetim hasebiyle menzil-i mezbûru yevmî iki akçe icâre-i müeccele ve on beş bin akçe icâre-i mu‘accele ile mezbûr Behram Subaşı’ya îcâr edip ol dahi vech-i muharrer üzere istîcâr ve kabûl etti dedikde gıbbe’t-tasdîk bi’t-taleb ketb olundu. Tahrîren fî-evâhiri Zilka‘deti’ş-şerîfe li-sene semân ve selâsîn ve elf. Şühûdü’l-hâl: Mustafa Çelebi Kâtib-i vakf, diğer Mustafa Çelebi Kâtib-i vakf, Ali Çelebi Câbî-i vakf, İsmail Çelebi Câbî-i vakf, İbrahim Çelebi Câbî-i vakf.