Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 623 Hüküm no: 568 Orijinal metin no: [182a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Haremeyn Evkafı mütevellisi İsmail Çelebi’nin Fatma bt. Mehmed’deki vakfın alacağının bir kısmını tahsil etmesi Mahrûsa-i İstanbul’da vâki‘ Haremeyn-i Şerîfeyn Evkāfı’na bi’l-fi‘il mütevellî olan fahrü’l-akrân İsmail Çelebi b. Mehmed meclis-i şer‘-i şerîf-i lâzımü’t-teşrîfde mahallât-ı mahrûsa-i mezbûrda Koruk Mahmud mahallesinde sâkine hâfızetü hâze’l-kitâb Fâtıma bt. Mehmed nâm hatun mahzarında takrîr-i kelâm edip evkāf-ı mezbûre mâlından mezbûre Fâtıma Hatun zimmetinde asl-ı mâl dokuz bin akçe ve murâbaha-i mer‘iyyeden bin üç yüz elli akçe ki cem‘an on bin üç yüz elli akçe olup meblağ-ı merkūm on bin üç yüz elli akçenin altı bin akçesini tevliyetim hasebi ile mezbûre Fâtıma yedinden taraf-ı vakf için ahz edip zimmetinde bâkī dört bin üç yüz elli akçe bâkī kaldı dedikde mukırr-ı mezbûr İsmail Çelebi’nin vech-i merkūm üzere cârî olan ikrârını el-mukırru lehâ’l-merkūme Fâtıma Hatun vicâhen ve şifâhen tasdîk ve tahkīk edicek, mâ-hüve’l-vâkı‘ bi’t-taleb ketb olundu. Fî-evâhiri Cemâziyelâhire li-sene tis‘a ve selâsîn ve elf. Şühûdü’l-hâl: Fahrü’l-müderrisîn Mustafa Efendi, Abdullah Çelebi el-müderris, Abdülhalim Çelebi el-müderris, Ali Bey b. ( ) el-bevvâb ve gayruhüm.