Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 74 Hüküm no: 36 Orijinal metin no: [21-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Misakoğlu Bedros’un ölümüyle küçük oğlu Heratin’e annesi Nâzenin’in vasi tayin edilmesi Tahakkuk-ı özr-i şer‘îye binâen husûs-ı âti’l-beyânın mahâllinde ketb ü tahrîri içün savb-ı şer‘-i enverden bi’l-iltimâs me’zûnen ta‘yîn ve irsâl olunan Kâtib el-Hâc Hüsnü Efendi cennet-mekân Sultan Mustafa Han -tâbe serâhû- hazretlerinin evkāf-ı şerîfeleri hudûdu dâhilinde medîne-i Üsküdar’a tâbi‘ Kādı karyesinde Cafer Ağa mahallesinde Mühürdâr caddesinde vâki‘ yetmiş altı numara ile murakkam bir bâb menzile varıp zeyl-i vesîkada muharrerü’l-esâmî kimesneler huzûrlarında akd-i meclis-i şer‘-i kavîm etdikde menzil-i mezkûrda sâkin iken bundan akdem fevt olan Devlet-i Aliyye teba‘asının Ermeni milletinden Misakoğlu Bedros v. Begos’un sulbî sagīr oğlu tahmînen beş yaşında Heratin’in vakt-i rüşd ü sedâdına değin tesviye-i umûruna kıbel-i şer‘den bir vasî nasbı lâzım ve mühim olmağın mu‘temedü’l-hâl olarak her vechile vesâyet uhdesinden gelmeğe muktedire idiği zeyl-i vesîkada muharrerü’l-esâmî kimesneler haberleriyle zâhir ve mütehakkık olan sagīr-i mezbûrun vâlidesi teba‘a-i Devlet-i Aliyye’den ve millet-i merkūme nisvânından işbu bâ‘isetü’l-vesîka Nâzenin bt. Agop sagīr-i mezbûrun vakt-i rüşd ü sedâdına değin tesviye-i umûruna kıbel-i şer‘den vasî nasb ü ta‘yîn olundukda ol dahi vesâyet-i mezkûreyi kabûl ve merâsimini kemâ-yenbagī edâya ta‘ahhüd ve iltizâm eylediğini kâtib-i mezbûr mahâllinde ketb ü tahrîr ve ma‘an mürsel ümenâ-i şer‘le meclis-i şer‘a gelip alâ-vukū‘ihî inhâ ve takrîr eylediğini Mahkeme-i Teftîş Beytü’l-mâl kassâmı fazîletlü efendi inhâ etmeğin mâ-vaka‘a bi’t-taleb ketb olundu. Fî 10 Za sene [1]300 Şühûd[ü’l-hâl]: Ahmed Ağa b. Mehmed, Ketebeden Hüsnü Efendi b. Ahmed ve gayruhum.