Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 76 Hüküm no: 38 Orijinal metin no: [22-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Koltukçu İbrahim’in vefatıyla küçük oğlu Mehmed Hidayet’e intikal eden arsa hissesinin satışına izin verilmesi Nazmi, izin: 1 kıt‘a Numara: 224, 10 guruş Mahmiye-i İstanbul’da Aksaray kurbünde Çakırağa nâm-ı diğer Mercimek mahallesinde sâkin iken bundan akdem vefât eden koltukçu esnâfından el-Hâc İbrahim Efendi b. Hasan’ın sulbî sagīr oğlu Mehmed Hidayet’in vâlidesi ve tesviye-i umûruna bâ-hüccet-i şer‘iye vasîyy-i mansûbesi zâtı ta‘rîf-i şer‘î ile mu‘arrefe olan işbu bâ‘isetü’l-kitâb Emine Hanım bt. Abdullah m. bi’l-vesâye takrîr-i kelâm edüp nezâret-i Evkāf-ı Hümâyûn’a mülhak evkāfdan Çatalca nâhiyesine tâbi‘ Baba Nakkāş karyesinde vâki‘ Defterdâr-ı esbak Derviş Mehmed Efendi Zâviyesi Vakfı musakkafâtından mahalle-i mezbûrede Asiye Hanım sokağında üç numara ile murakkam ma‘lûmü’l-hudûd ve’l-müştemilât beher şehr on beş akçe icâre-i müeccelelü bir kıt‘a menzil arsası müteveffâ-yı mezbûrun hayatında bâ-temessük-i mütevellî bi’l-icâreteyn taht-ı tasarrufunda olup ba‘de vefâtihî sagīr-i mezbûr ile sulbî kebîr oğlu Ali Rıza Efendi ve sulbiye kebîre kerîmesi Şerife Hâce Âişe Hanım’a islâsen intikāl edüp lâkin arsa-i mezkûrun etrâfını muhît taş duvarları münhedim olarak enkāzı mürûr-ı eyyâm ile telef ve zâyi‘ olacağı zâhir ve bedîdâr olup ol-vechile bekāsı sagīr-i mezbûr hakkında gayr-ı nâfi‘ olduğundan mâ‘adâ sagīr-i mezbûrun nafaka ve kisveye dahi eşedd-i ihtiyâcı olmağla sagīr-i mezbûrun arsa-i mezkûrede olan sülüs hisse-i şâyi‘ası bedel-i misliyle bâ-re’y-i mütevellî âhara ferâğa ve bedeli ahz ü kabz birle i‘mâl ve istirbâh olunup hâsıl olan nemâsıyla infâk ve iksâ olunmak sagīr-i mezbûr hakkında her vechile enfa‘ ve evlâ olduğuna binâen işbu yedimde olup hâlâ kassâm-ı askerî fazîletlü Mehmed Emin Efendi ile Birinci Dâire-i Belediye taraflarından i‘tâ olunan memhûr bir kıt‘a tahmîn-i bedel pusulası mantûkunca sagīr-i mezbûrun arsa-i mezkûrede olan sülüs hisse-i şâyi‘ası bundan akdem lede’l-müzâyede ve ba‘de’l-keşf el-yevm bedel-i misli idiği bi’l-ihbâr zâhir olan lira-yı Osmânî yüz guruş hesâbıyla altı yüz altmış altı guruş on dört para mukābelesinde âhara ferâğa izin taleb şüd. Fî 15 Za sene [1]300 Şühûdü’l-hâl: Ali Bey b. İbrahim, Hafız Salim Efendi b. el-Hâc Süleyman ve gayruhum.