Galata Mahkemesi 7 Numaralı Sicil (H. 985 - 986 / M. 1577 - 1578) cilt: 33, sayfa: 62 Hüküm no: 66 Orijinal metin no: [23-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fâtıma bt. Hüsrev Bey’in miras hakkını aldığı Vech-i tahrîr-i hurûf budur ki, Fâtıma bt. Hüsrev Bey nâm kimesne kıbelinden Ahmed Çelebi b. Mehmed ve Hüseyin Çelebi b. Bâli nâm kimesneler şehâdetleri ile vekâleti sâbit olan Hüseyin Çelebi b. Bâli mahfil-i şer‘a hâzır olup bâ‘isü’s-sicil Pîrî Bey b. Abdullah el-Vasî li eytâmi Hüsrev Bey el-merkūm muvâcehesinde ikrâr ve i‘tirâf edip müvekkilem mezbûre Fâtıma’ya babası merhûm-ı mezbûr Hüsrev Bey’den intikāl eden muhallefât bahâsından ve mahrûse-i Edirne’de olan ev bahâsından on dört bin üç yüz seksen dokuz akçe alıp kabz eyledim vasiyy-i mezbûr yedinden ve müvekkilem mezbûrenin vâlidesi Güllâle bt. Abdullah nâm Hâtuna intikāl eden sümün hissesini ve ba‘de’s-sübût mezbûre Güllâle’ye hükm olunan mehr-i müeccelini ki mezbûre Güllâle müvekkilem mezbûre Fâtıma’ya hibe etmişdi mezbûrenin sümün hissesini ve mehr-i müeccelinden on altı bin akçesini vasiyy-i merkūm yedinden alıp kabz eyledim dedikde mukarrun lehü’l-merkūm vekîl-i merkūmun vech-i meşrûh üzre ikrârını tasdîk ettikden sonra mâ hüve’l-vâki‘ bi’t-taleb sicil olundu. Tahrîren fî evâsıtı Receb sene 985. Şuhûdü’l-hâl: Mustafa b. Ser-hâce Cihan, Veli Bey b. Abdullah, Hüseyin Bey b. Abdullah, Musa Halîfe b. Yahya, Ali b. Mehmed, Hızır b. Abdullah el-Cündî, Cafer b. Abdullah el-Kayyım ve gayruhüm