Galata Mahkemesi 7 Numaralı Sicil (H. 985 - 986 / M. 1577 - 1578) cilt: 33, sayfa: 80 Hüküm no: 99 Orijinal metin no: [35-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Sütlüce’de ölen Hüseyin Reis b. Abdullah’ın vasiyeti Vakfiye Receb [b.] Ali nâm kimesne meclis-i şer‘de Sütlüce’de Halim Hoca mahallesi imâmı ve cemâ‘ati mahzarlarında da‘vâ ve takrîr-i merâm edip Sütlüce’de fevt olan Hüseyin Reis b. Abdullah maraz-ı mevtinde sülüs-i malını vasiyyet edip ve beni vasiyy-i muhtâr edip sülüs-i mezbûrun ba‘zın üzerime harc eyle ve ba‘zın âhara dahi mahalle-i mezbûre mescidinin imâmetine Kur’ân-ı azîm tilâvetiyçün ta‘yîn eyle senin re’yine müfevvezdir deyip fevt olucak sülüs-i maldan beş bin beş yüz doksan iki akçe hâsıl olup bin beş yüz doksan iki akçesi harc-ı ma‘kūlüne sarf edip bâkī üç bin akçesini vasiyyet muktezâsınca mescid-i mezbûrun imâmına ta‘yîn olunmasını taleb ederim dedikde mahalle-i mezbûre ahâlîsinden suâl olundukda mezbûr Receb’in re’yine müfevvez olup ve istikāmetine şehâdet ettiklerine binâen ettiği harc mukarrer tutulup ve bâkī kalan üç bin akçe ve iki pul mezbûr Receb’e teslîm olundukdan [sonra] mütevellî ta‘yîn olunup onuna on bir akçe hesâbı üzre mu‘âmele-i şer‘iyye yılda üç yüz yetmiş beş akçe ribh olur imâm-ı mezbûr yılda üç hatm-i şerîf tilâvet edip üç yüz akçesi ana verilip ve bâkī kalan yetmiş beşi cihet-i tevliyyet olmak üzre mukarrer kılınıp yedine temessük verildi [ki] vakt-i hâcetde müzekkir-i mâ cerâ ola. Şuhûdü’l-hâl: Abdüsselâm Halîfe el-İmâm el-mezbûr, Mustafa b. Mehmed, Ali b. Veli, Bostan Çelebi b. Ali, Mustafa [b.] Yusuf el-Muhzır ve Mustafa b. Kerim el-Muhzır ve gayruhüm Yevmü’l-Hamîs Yevmü’l-Cum‘a fî 14 Şa‘bâni’l-mu‘azzam sene 985