Galata Mahkemesi 7 Numaralı Sicil (H. 985 - 986 / M. 1577 - 1578) cilt: 33, sayfa: 84 Hüküm no: 112 Orijinal metin no: [38-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kasım b. Abdullah’ın Frenk asıllı kölesini sözleşmeli olarak azat ettiği İşbu hâmilü’l-kitâb orta boylu açık kaşlı buğday enli koyun elâ gözlü başının sağ cânibi mecrûh ve sol yarısı yanık Efrenciyyü’l-asl Hasan b. Abdullah meclis-i şer‘de mevlâsı müteveffâ Kasım b. Abdullah nâm kimesnenin sagīr oğlu Hasan’ın ve sagīre kızı Meryem’in vasiyye-i şer‘iyyeleri olan Mülâyim bt. Abdullah tarafından husûs-ı âti’z-zikre Hasan Reis b. Abdi ve Ahmed Reis b. Abdullah şehâdetleriyle vekâleti sâbit olan Mehmed b. Yusuf mahzarında takrîr-i da‘vâ edip târih-i kitâbdan üç yıl mukaddem mevlâm mezbûr Kasım hîn-i marazında ikrâr ve vasiyyet edip zikr olunan sagīr oğullarıma üç yıl hizmet eyle andan sonra azât ol deyip ben dahi kabûl edip üç yıl hizmet eyledim tahliyye-i sebîl taleb ederim dedikde mezbûr Mehmed’den istintâk olunup inkâr ile cevâb vericek mezbûr Hasan’dan sıdk-ı makāline beyyine taleb [olundukda] udûl-i müslimînden Solak Süleyman Bey b. Abdullah ve Yusuf Reis b. Abdullah da‘vâsına muvâfık fi’l-vâki‘ mezbûr Kasım hîn-i marazında ikrâr ve vasiyyet edip mezkû[r] Hasan zikr olunan oğullarıma üç yıl hizmet edip ondan sonra azât olunsun dedikden sonra musırran fevt olup merhûm Hasan dahi vech-i meşrûh üzre kabûl edip üç yıl tamâm edâ-i hizmet eyledi deyû edâ-i şehâdet-i şer‘iyye ettiklerinde şehâdetleri makbûle olup mûcebiyle hükm olundu. Şuhûdü’l-hâl: Cafer Reis b. Abdullah ve korucu Mustafa [b.] Abdullah ve Buzağu Abdi Reis ve Zünnû Alisi ve Eyüb Reis ve gayruhüm mine’l-hâzırîn [Yev]mü’s-Sülesâ