Galata Mahkemesi 7 Numaralı Sicil (H. 985 - 986 / M. 1577 - 1578) cilt: 33, sayfa: 96 Hüküm no: 145 Orijinal metin no: [47-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hümâ bt. Mahmud’un, Mehmed Çelebi b. Ali’yle olan davalarından feragati Hümâ bt. Mahmud nâm hâtun meclis-i şer‘de müteveffâ zevci Keyvan b. Abdullah’ın mevlâsı olan Mehmed Çelebi b. Ali mahzarında ikrâr ve takrîr-i merâm edip bundan akdem zevcim mezkûr Keyvan fevt oldukda hâric-i Galata’da Yeni Mahalle’de vâki‘ olup bir tarafı dellâl Hasan b. Abdullah mülküne ve taraf-ı âharı İmâm Nurullah Halîfe mülküne ve bir tarafı Baba mülküne ve taraf-ı âharı dahi şerbetçi Murad mülküne müntehî olan menzilinin nısf binâsı benim mülkümdür deyû da‘vâ etmiş idim ve bundan mâ‘adâ mezkûr Mehmed Çelebi evim basıp te‘addî eyledi deyû da‘vâ eylemiş idim hâlâ zikr olunan da‘vâlardan ferâgat edip ve mezbûr Mehmed Çelebi’nin zimmetini ibrâ eyledim min ba‘d da‘vâ edersem inde’l-hükkâm mesmû‘ olmaya dedikde mukırra-i mezbûrenin ikrârı mezbûr Mehmed Çelebi talebiyle kayd olundu. Şuhûdü’l-hâl: Hasan Çavuş b. Mehmed el-Mübâşir ve Mustafa b. Hüseyin ve Hasan b. Halil ve Mustafa b. Yusuf el-Muhzır ve Mustafa b. Kerim el-Muhzır