Galata Mahkemesi 7 Numaralı Sicil (H. 985 - 986 / M. 1577 - 1578) cilt: 33, sayfa: 107 Hüküm no: 175 Orijinal metin no: [55-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Seyyid Hüseyin b. Seyyid Mustafa’nın, amcası Seyyid Ahmed b. Seyyid Yusuf’un karısı Gazal’ı muhallefâta ilişkin davada ibrâ ettiği Seyyid Hüseyin b. Seyyid Mustafa nâm kimesne meclis-i şer‘-i şerîfde işbu hâmilü’l-kitâb müteveffâ ammisi Seyyid Ahmed b. Seyyid Yusuf’un zevcesi Gazal bt. Abdullah mahzarında ikrâr ve i‘tirâf edip mukaddemâ mezbûr Seyyid Ahmed fevt oldukda mezkûre Gazal beytülmâlci yüzüne Rûşen nâm câriye ve altı bin akçe ve kendiye sâlih ba‘zı esbâb isbât edip eline hüccet aldıkdan sonra bâkī kalan[ı] dahi ikimiz bey‘ edip şer‘le taksîm eyledik hâlâ zikr olunan câriye ve akçe ve sâir esbâba ve muhallefâta müte‘allik olan da‘vâlardan ibrâ ve iskāt eyledim mezbûre Gazal ile [mi]n ba‘d mezkûr Seyyid Ahmed’in muhallefâtına müte‘allik da‘vâm ve nizâ‘ım yoktur [da]‘vâ dahi edersem inde’l-hükkâm mesmû‘ olmaya dedikde mukırr-ı merkūmu [me]zbûre Gazal vicâhen tasdîk edib bi’t-taleb kayd olunup sûreti yedine def‘ olundu. Tahrîren fî evâili Saferi’l-muzaffer sene sitte ve semânîn ve tis‘a mi’e. Şuhûdü’l-hâl: Şeyh Ahmed b. Mehmed el-İmâm, Ahmed Bey b. Mehmed el-Câbî, Mustafa Çavuş b. Ali Çavuş, Mehmed Çavuş b. Kasım Bey, Hüseyin Çelebi b. Mustafa Destârî, Gāzi Mustafa b. [A]bdüllatif, Hasan b. Nebi Topal, Behram Dede b. Abdullah Türbedâr ve Ahmed b. İsa ve gayruhüm