Galata Mahkemesi 7 Numaralı Sicil (H. 985 - 986 / M. 1577 - 1578) cilt: 33, sayfa: 114 Hüküm no: 196 Orijinal metin no: [61-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Arazi ihtilafının sulh yoluyla halli Veli b. Hayreddin ve vâlidesi Züleyha bt. İskender nâm Hâtun meclis-i şer‘-i şerîfde işbu hâmiletü’l-kitâb merhûm Süleyman Reis’in zevcesi Fâtıma bt. Sinan’ın vekîl-i şer‘îsi olan Ahmed Halîfe b. Abdullah mahzarında ikrâr ve i‘tirâf edip mukaddemâ Kasım[paşa] kurbunda Çatma Mescid mahallesinde vâki‘ olup bir cânibi mezbûre Fâtıma ve bir cânibi Haydar b. Abdullah el-Kayyım mülküne ve bir cânibi mezbûr Veli mülküne ve bir cânibi Belkıs Hâtun bt. Kasım Paşa mülküne müntehî olup bin sekiz zirâ‘ tûlü ve on zirâ‘ arzı olan arz-ı hâliye[yi] mezkûr Süleyman Reis’e altı bin akçeye bey‘ edip meblağ-ı mezbûru alıp kabz eyleyip birkaç yıl mürûr ettikden sonra mezkûr Reis mezbûre Fâtıma’ya bey‘ edip fevt oldukdan sonra mukaddemâ ettiğimiz bey‘ şart ile ve gabn-i fâhişle olmuşdur deyû arz-ı mezkûreye müte‘allik da‘vâ ve nizâ‘ eylemiş idik hâlâ mezbûre Fâtıma’nın vekîli Ahmed Halîfe elinden iki bin akçe bedel-i sulh alıp mezbûre Fâtıma’nın zimmetini ibrâ ve iskāt eyledik min ba‘d arz-ı mezkûreye müte‘allik da‘vâmız ve nizâ‘ımız yoktur dediklerinde mukırr-ı merkūmu mukarrun-lehü’l-mesfûr vicâhen tasdîk edip kayd olundu. Şuhûdü’l-hâl: Hüseyin b. İlyas el-Müezzin, el-Hâc Mehmed b. Mahmud el-Müezzin, el-Hâc Murad b. Abdullah el-Kassâb, usta Ali b. Mahmud, usta Hüsrev b. Abdullah ve usta Pervâne b. Abdullah