Galata Mahkemesi 7 Numaralı Sicil (H. 985 - 986 / M. 1577 - 1578) cilt: 33, sayfa: 115 Hüküm no: 199 Orijinal metin no: [62-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mahreme bt. Hamza ve vasîsi olduğu oğlunun biribirinin zimmetlerini karşılıkla ibrâ ettikleri Mahreme bt. Hamza, meclis-i şer‘de oğlu Mustafa b. Kasım Reis mahzarında ikrâr ve i‘tirâf [edip] mukaddemâ mezbûr Mustafa’ya vasiyye olduğumda vasiyy-i sâbık elinden otuz iki bin akçe ba‘zı nakid ve ba‘zı zimem-i nâsdan kabûl ettiğimden sonra mezkûr Kurd yevmî dört akçe nafaka takdîr ettirip yedi sekiz yıl mikdârı asl-ı mâldan ve murâbahadan infâk eyledim ve kendi bâliğ oldukdan sonra ba‘zı zimemden akçe kabz edip kaftanlar ve esbâblar edinmişdir ve bi’l-cümle hâlâ benim zimmetimde asl-ı mâldan ve ribhden yirmi dört bin akçeden gayrı nesne kalmadı zikr olunan yirmi dört bin akçeyi tahsîl ediverin deyû mültezim olup zikr olunan yirmi dört binden ziyâde mezbûr Mustafa’nın benim zimmetimde hakkı ve benim dahi mezbûr Mustafa zimmetinde nafakadan vesâir vücûhdan min ba‘d hakkım yoktur zikr olunan yirmi dört bin akçeye müte‘allik olan da‘vâdan gayrı sâir hukūka müte‘allik olan da‘vâdan biribirimizin zimmetini ibrâ eyledik dediklerinde mukırr-ı merkūmu mukarrun-lehü’l-mesfûr vicâhen tasdîk edip kayd olundu. Şuhûdü’l-hâl: Mehmed b. Selamet el-İmâm, el-Hâc Memi b. İskender, Sefer Reis b. Hamza, Musa Reis b. Servet, Mustafa b. Ahmed, Cafer b. Abdullah, Memi b. Abdullah, Sefer b. Ferhad, Muslihiddin Reis, Süleyman Reis, Mustafa b. Yusuf el-Muhzır ve gayruhüm mine’l-hâzırîn