Galata Mahkemesi 15 Numaralı Sicil (H. 981 - 1000 / M. 1573 - 1591) cilt: 34, sayfa: 54 Hüküm no: 25 Orijinal metin no: [4a-4, Arapça] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Süleyman b. Abdullah’ın ev bedelinden Âişe Sultan Vakfı’na borcu olduğu Sinan b. Hasan el-Müezzin ve İbrahim b. Abdullah nâm kimesneler meclis-i şer‘-i şerîfe hâzırân olup, Galata ve havâss-ı mahmiye-i Kostantıniyye’de vâki‘ beytülmâlin emîni Mustafa Çelebi b. Yusuf kıbelinden âti’z-zikr da‘vâyı istimâ‘a vekâleti bimâ hüve tarîkü’s-sübût şer‘an sâbit olan Fâik Bey b. Abdullah ve kâtib-i emîn Ali Bey b. Abdullah mahzarlarında, Âişe Sultan vakfı’na mütevellî olan hâmil-i hâze’l-kitâb el-Hâc Ferhad b. Abdullah’dan sâdır olan da‘vâ-yı sahîha-i şer‘iyyede gıbbe’l-istişhâd şöyle şehâdet ettiler ki, hâric-i mahmiye-i Galata mahallâtından Piyâle Paşa mahallesinde bundan akdem fevt olan Süleyman b. Abdullah hâl-i hayâtı ve kemâl-i sıhhatinde vakf-ı mezbûra, mahalle-i merkūmede kâin, tahtânî iki beyti, avluyu ve helâyı müştemil olup bir tarafdan Mustafa b. Yusuf mülkü ile ve etrâf-ı selâsesi tarîk-i âm ile mahdûd bulunan menzil bahâsından iki bin akçe deyni olduğunu bizim yanımızda ikrâr ve bizim katımızda i‘tirâf etti. Şehâdetleri ba‘de ri‘âyeti şerâiti’l-kabûl inde’ş-şer‘ makbûl ve mû‘teber olmağın mûcebince hükm edildi. Şuhûdü’l-hâl: Mehmed b. Bâli, Mustafa b. Yusuf, Hüseyin b. Abdullah, Ramazan b. Dursun.