Galata Mahkemesi 15 Numaralı Sicil (H. 981 - 1000 / M. 1573 - 1591) cilt: 34, sayfa: 59 Hüküm no: 35 Orijinal metin no: [6a-1, Arapça] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ferruh b. Abdullah Reis’in kölesini azat ettiği Ali Bey b. Abdullah ve Ahmed b. Abdullah nâm kimesneler, Halkulvâdi muhârebesinde fevt olan Ferhad Reis b. Abdullah’ın Şaban ve Safiye nâm sagīreynine vasiyyeyn-i muhtâreyn olan Hürrem b. Abdullah Reis ve Haydar b. Abdullah mahzarlarında ve müteveffâ-yı mezbûrun zevcesi Fâtıma bt. Ahmed’in mahzarında, sarışın, açık kaşlı, Mağribiyyü’l-asl Hasan b. Abdullah nâm sagīre kıbel-i şer‘den mansûb vasî olan hâmil-i hâze’l-kitâb Ferruh b. Abdullah’dan sâdır olan da‘vâ-yı sahîha-i şer‘iyyede gıbbe’l-istişhâd şöyle şehâdet ettiler ki, mezbûr Ferhad Reis hâl-i hayâtı ve kemâl-i sıhhatinde sagīr-i mezbûru maraz-ı mevtimden sonra hürsün diyerek mutlak tedbîr ile tedbîr eyledi. Şâhidân-ı mezbûrân, müteveffâ-yı merkūmun, sagīr-i mezkûra sülüs-i mâlından râyicü’l-vakt bin sekiz yüz akçe vasiyyet ettiğine dahi şehâdet ettiler. Şehâdetleri ba‘de ri‘âyeti şerâiti’l-kabûl ve ba‘de’t-ta‘dîl ve’t-tezkiyye inde’ş-şer‘ makbûl ve mû‘teber olmağın mûcebince ıtkına ve meblağ-ı merkūmun edâsına hükm edildi. Vasiyyeyn-i mezbûreyn, meblağ-ı merkūmu teslîm etti. Vasiyy-i merkūm da sagīr-i mezkûr için meblağı onlardan ahz ü kabz etti. Abd-i mezbûr bu sûretle sâir ahrâr-ı asliyyîn gibi hür oldu. Cerâ zâlike ve hurrire fî evâili Rebî‘ilâhir sene 983. Şuhûdü’l-hâl: Mehmed Çelebi b. Haydar, İskender b. Abdullah, Ferhad b. Abdullah, Ahmed Bey b. Abdullah, Muslihiddin b. Yusuf, Hasan b. Abdullah, Hamza b. Abdullah, Memi b. Abdullah ve gayruhüm mine’l-müslimîn.