Galata Mahkemesi 15 Numaralı Sicil (H. 981 - 1000 / M. 1573 - 1591) cilt: 34, sayfa: 64 Hüküm no: 47 Orijinal metin no: [8a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed bey b. Ali’nin terekesinin mirasçılar arasında sulh yolu ile paylaşılması Kasaba-i Ebî Eyyûb el-Ensârî aleyhi rahmetü’l-Meliki’l-Bârî mahallâtından Kasım Çavuş mahallesinde vefât eden Mehmed Bey b. Ali nâm solağın asabe-i nesebiyyesi olan Ali b. Turhan cânibinden bimâ hüve tarîkü’s-sübût şer‘an husûs-ı âti’z-zikre vekîl olup ve vekâleti sebt-i sicil olan Mehmed b. Hasan müteveffâ-yı mezbûrun li eb ve üm kız karındaşı Huri Hâtun bt. Ali cânibinden kezâlik vekîl olan Mustafa b. Abdullah mahzarında takrîr-i kelâm ve ta‘bîr-i merâm kılıp bundan akdem müteveffâ-yı mezbûr vefât ettikde mezbûre Huri muhallefâtın kabz edip bi’l-vekâle da‘vâ ettikde münâza‘ât-ı kesîre vâki‘ olmuş idi el-hâletü hâzihî tavassut-ı muslihîn ile zikr olunan husûsu mezbûr vekîl ile bin nakd-i fıddî râyic fi’l-vakt akçeye ıslâh edip bedel-i sulhu mezbûr vekîl yedinden alıp kabz edip tarafeynden ibrâ ve iskāt olduk dedikde mukırr-ı merkūmun vech-i meşrûh üzre olan kelâmın mezbûr Mustafa vicâhen ve şifâhen tasdîk edip mâ hüve’l-vâki‘ bi’t-taleb kayd olundu. Tahrîren fî evâsıtı Muharremi’l-harâm sene seb‘a ve semânîn ve tis‘a mi’e sene 987. Şuhûdü’l-hâl: Mahmud Sofu b. Aslan el-İmâm bi Mescid-i Bâli Hoca, Hasan Halîfe b. Hüseyin el-İmâm bi Mescid-i Çavuş Kasım, Sünbül b. Abdi el-Müezzin li Câmi‘-i Kebîr Eyyûb, Ömer Bey b. Abdullah er-Râcil, Ali Çelebi b. Mehmed el-Okçu, Hüseyin b. Bâli el-Hayyât, Cafer b. Abdullah el-Hayyât-ı mîrî, Mehmed Çelebi b. Abdülkādir Çelebi, Ebûbekir Çelebi b. Abdülkādir Çelebi, Ahmed Çelebi b. Hasan Bey, Mahmud Çelebi b. Muhyiddin Halîfe ve gayruhüm.