Galata Mahkemesi 15 Numaralı Sicil (H. 981 - 1000 / M. 1573 - 1591) cilt: 34, sayfa: 71 Hüküm no: 56 Orijinal metin no: [11a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fâtıma bt. Durmuş’un, ölen kardeşi Mahmud Bey’e verdiği köleleri terekesinden geri istediği Oldur ki Mahrûse-i Galata tevâbi‘inden Beşiktaş’da sâkin iken vefât eden merhûm Mahmud Bey’in vâlidesi Fâtıma bt. Durmuş Reis nâm hâtun kıbelinden husûs-ı âti’z-zikr için bimâ hüve tarîkü’s-sübût şer‘an vekâleti sâbite olan oğlu Mustafa Bey b. Perviz Bey nâm kimesne mahfil-i şer‘-i şerîfde müteveffâ-yı mezbûrun Ahmed ve Mehmed nâm sıgārlarının emvâl ve etvârına nâzır olan fahrü’l-müderrisîn Mevlânâ Muslihiddin Efendi b. Hasan muvâcehesinde takrîr-i da‘vâ edip müvekkilem olan vâlidemin müteveffâ karındaşım hâl-i hayâtında iken bedel tarîkiyle on re’s forsa kâfiri vermiş zikr olunan forsaları metrûkâtından taleb ederim suâl olunsun dedikde gıbbe’s-suâl mezbûr Nâzır Muslihiddin Efendi inkâr ile cevâb verdikde vekîl-i merkūm Mustafa Bey’den da‘vâsına mutâbık beyyine taleb olundukda udûl-i müslimînden Hüseyin Bey b. Abdullah ve Mahmud Ağa b. Abdullah nâm kimesneler li ecli’ş-şehâde hâzırûn, da‘vâsına muvâfık şehâdet-i şer‘iyye eylediklerinde ba‘de’t-ta‘dîl hayyiz-i kabûlde vâki‘ oldukdan sonra zikr olunan kâfirlerin birisi mürd olup bâkīsi mevcûd olmağın mezbûr Mustafa Bey’e hükm olunup bu vesîka ber sebîl-i temessük ketb olundu. Şuhûdü’l-hâl: Mehmed Bey b. Abdülcebbâr?, Kurd Bey b. Mehmed, Hüsrev b. Abdullah, Haydar b. Abdullah, …? Musli b. Abdullah, Murad b. Abdullah.