Galata Mahkemesi 15 Numaralı Sicil (H. 981 - 1000 / M. 1573 - 1591) cilt: 34, sayfa: 90 Hüküm no: 91 Orijinal metin no: [21a-5] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. El-Hâc Mehmed Bey b. Ahmed’in, ölen Bayezid Voyvoda’dan alacaklı olduğu Sâbıkan Budin’den yeniçeriler kâtibi olan işbu râfi‘ü’l-kitâb el-Hâc Mehmed Bey b. Ahmed meclis-i şer‘-i kavîm mahmiye-i Galata ve tevâbi‘i beytülmâl-i hâs emîni fahrü’l-ümenâ Musa Bey b. Kaya’yı ihzâr ve mahzarında takrîr-i kelâm edip kasaba-i Çekmece’de Budin’den gelirken fevt olan Bayezid Voyvoda’da altmış sikke guruşum olup cihet-i karz vermişdim emîn-i mezbûr muhallefâtın kabz etmişdir taleb ederim deyicek gıbbe’s-suâl fi’l-hakīka mezbûr Bayezid Voyvoda’nın muhallefâtın kabz ettim lâkin altmış guruş deyni olduğu ma‘lûmum değildir deyû cevâb vericek müdde‘î-i mezbûr istişhâd olundukda udûl-i müslimînden Memi b. Tatar nâm kimesne asâleten ve Hasan Bey b. Abdullah nâm sipâhi lisânından el-Hâc Mustafa b. Mehmed ez-Za‘îm ve Ali b. Mustafa nâm kimesneler varıp bizi mezbûr Hasan Bey müdde‘î-i mezbûrun müteveffâ Bayezid Voyvoda zimmetinde altmış guruş olduğuna şehâdet ettikden sonra işhâd ve tahmîl-i şehâdet etmişdir şâhidiz [21b] deyû edâ-i şehâdet edip ve mezbûr Memi dahi şâhiden şehâdet ederim ki müdde‘î-i mezbûr müteveffâ-yı merkūme altmış guruş karz vermiş deyû edâ-i şehâdet edicek şehâdetleri hayyiz-i kabûlde vâki‘ olup tahlîf-i şer‘î olundukdan sonra meblağ-ı mezbûrun edâsıyla hükm olundu. Tahrîren fî evâili şehri Cumâdelâhire sene semânîn ve tis‘în ve tis‘a mi’e. Şuhûdü’l-hâl: Mustafa b. Abdülkerim, Mustafa b. Ali, Hasan b. Abdullah, Lütfi b. Yusuf ve gayruhüm.