Galata Mahkemesi 15 Numaralı Sicil (H. 981 - 1000 / M. 1573 - 1591) cilt: 34, sayfa: 101 Hüküm no: 103 Orijinal metin no: [26a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. El-Hâc Mehmed’in, evini ölmeden önce İbrahim Bey b. Abdullah’a sattığı Mahmiye-i Galata’da Câmi‘-i Kebîr mahallesinde harîkan fevt olan el-Hâc Mehmed’in veresesinden oğlu oğlu Hüseyin b. Mehmed b. el-Hâc Mehmed meclis-i şer‘-i şerîfe sâbıkan merhûm-ı merkūmun Meryem nâm kızını tezevvüc edip taht-ı nikâhında iken vefât eyleyen İbrahim Bey b. Abdullah nâm cerrâh-ı sultânîyi ihzâr eyleyip taht-ı tasarrufunda olan menzil-i ma‘lûmü’l-hudûd mûrisim el-Hâc Mehmed’indir henüz taksîm olunmayıp beyne’l-verese kalmışdır mezbûr bi gayr-ı vech-i şer‘î tasarruf eder deyû da‘vâ eyledikde mezbûr İbrahim Bey menzil-i mezbûrun yerini merkūm Hüseyin’in vasîsinden ve sâir verese kendi nefsim için iştirâ ettim mülk-i mahzımdır deyû cevâb verip hüccet-i mübâye‘a ibrâz eyledikden sonra verese-i kibâr mezbûra bey‘ eylediklerin inkâr edip zevcesi Meryem’e bey‘ olunmuşdu dediklerinde mezbûr dahi bi’t-tav‘ ve’r-rızâ fi’l-hakīka zevcem Meryem’e altı bin akçeye iştirâ etmişidim yeri zevcemin mülk-i muhallefidir deyû ikrâr edicek merkūm Hüseyin talebiyle i‘tirâfı kayd-ı sicil olundu. Tahrîren fî evâhiri Cumâzidelâhire li sene semân ve tis‘în ve tis‘a mi’e. Şuhûdü’l-hâl: Mahmud b. İslâm, Receb b. Abdullah, Yusuf b. ( ), İsa b. Abdurrahman el-İmâm ve gayruhüm mine’l-hâzırîn.