Galata Mahkemesi 15 Numaralı Sicil (H. 981 - 1000 / M. 1573 - 1591) cilt: 34, sayfa: 124 Hüküm no: 143 Orijinal metin no: [36b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ahmed Bey’in yetimi Ahmed’e vasî olan Ümmügülsüm bt. el-Hâc Receb’in eski vasî zimmetindeki yetimin mallarını teslim aldığı Mahmiye-i hâric-i Galata’da Hasköy sâkinelerinden müteveffâ Ahmed Bey’in yetîmi Ahmed’e kıbel-i şer‘den vasiyye nasb olunan vâlidesi Ümmügülsüm bt. el-Hâc Receb nâm hâtun meclis-i şer‘-i şerîfde işbu hâmilü’l-kitâb bundan akdem yetîm-i mezbûra vasî olan Şaban Halîfe b. Receb mahzarında bi tav‘ihâ ikrâr ve i‘tirâf eyleyip dedi ki yetîm-i merkūma babası müteveffâ-yı mezbûrdan irs-i şer‘îyle intikāl eden emvâlini merkūm Şaban Halîfe vesâyeti hasebiyle zabt ve kabz eylemiş idi hâlen yerine ben vasî olup merkūm Şaban Halîfe muhallefât defteri mûcebince kabz eylediği mâlın muhâsebesi görülüp ba‘de külli’l-hesâb hâsıl olan ribh ile havza-i tasarrufundan gayrı seksen iki bin sekiz yüz doksan iki akçe gösterdiği zimemden kabûl edip yetîm-i mezbûrun emvâl ve erzâkına müte‘allik vasiyy-i merkūm Şaban Halîfe’nin zimmetinden bir akçe ve bir habbe bâkī kalmadı dedikde mukırra-i mezbûrenin ikrâr-ı meşrûhunda mukarrun lehü’l-merkūm Şaban Halîfe tasdîk edip bu vesîka-i enîka ber sebîl-i temessük kayd şüd. Tahrîren fî şehri Şa‘bâni’l-mu‘azzam sene 998. Şuhûdü’l-hâl: Rüstem b. Abdullah el-Cündî, Halil b. Ali el-İmâm, İsmail [b.] Mehmed, Hüseyin b. Abdullah, Keyvan b. Abdullah.