Galata Mahkemesi 15 Numaralı Sicil (H. 981 - 1000 / M. 1573 - 1591) cilt: 34, sayfa: 147 Hüküm no: 192 Orijinal metin no: [46a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ölen Odabaşı Hasan’ın evinin, karısı Aynî Hâtun bt. Abdullah’a olan borcuna karşılık karısına verildiği Mahmiye-i beytülmâl emîni olan Musa Çavuş b. Kaya mahfil-i kazâda mahmiye-i mezbûre mahallâtından Bereketzâde mahallesi sâkinlerinden olup Kuruçeşme nâm mevzi‘de fevt olan odabaşı Hasan nâm müteveffânın zevcesi Aynî Hâtun bt. Abdullah’ın husûs-ı âti’z-zikri tasdîka vekîl olup vekâleti bimâ hüve tarîkü’s-sübût şer‘an sâbite olan işbu hâmilü’l-kitâb fahrü’l-akrân Yusuf b. Mahmud mahzarında takrîr-i kelâm ve tebyîn-i merâm kılıp dedi ki müteveffâ-yı mezbûrun zevcesi mezbûre Aynî Hâtun’un mahalle-i mezbûrede vâki‘ bir cânibi Bayram Reis mülküne ve bir cânibi Ahmed Yeniçeri mülküne ve bir cânibi Âişe Hâtun mülküne ve bir tarafı tarîk-i âma müntehî olan mülk menziline müteveffâ-yı mezbûr ba‘zı binâ ihdâs eylediği sâbit olucak Mustafa b. İbrahim ve Ali Çavuş b. Abdullah ve İsa b. Abdurrahman ve cemm-i gafîr ve cemâ‘at-i kesîre ile menzil-i mezbûr üzerine varılıp zikr olunan binâya nazar olundukda yirmi bir bin akçe takvîm olunup mezbûre Aynî’nin zevci müteveffâ-yı mezbûr zimmetinde on bin akçe mehr-i müeccel ve on bir bin akçe dahi karz-ı hasenden cem‘an yirmi bir bin akçe hakk-ı şer‘îsi olduğu bi hasebi’ş-şer‘ sâbit ve zâhir oldukda müteveffâ-yı mezbûrun zikr olunan binâsını zevcesi merkūme Aynî’nin yirmi bin akçe deynine tuta verip teslîm eyledim ol dahi zikr olunan deyne tuta kabûl eyledikde vekîl-i mezbûr Yusuf Bey emîn-i merkūm Musa Çavuş’un kelâmını vicâhen tasdîk ve şifâhen tahkīk eyledikde mâ vaka‘a kayd olundu. Tahrîren fî evâhiri Zilhicce sene 998. Şuhûdü’l-hâl: Abdülkādir b. Hacı, Musli b. Abdullah, Mehmed b. Hasan el-İmâm, Mehmed b. Mustafa, Ali b. Abdullah, İsa b. Abdurrahman ve gayruhüm.