Galata Mahkemesi 15 Numaralı Sicil (H. 981 - 1000 / M. 1573 - 1591) cilt: 34, sayfa: 150 Hüküm no: 195 Orijinal metin no: [47b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ölen Memi Ağa’nın terekesini alıp Hazine-i âmire’ye teslim eden beytülmal emini Musa Bey b. Kaya’nın, vârisi olduğunu ispat eden Murad Bey b. Abdullah’a terekeyi teslim ettiği Oldur ki Mahmiye-i Galata’da bi’l-fi‘l emîn-i beytülmâl-i hâssa olan fahrü’l-ümenâ’i’l-mu‘temedîn Musa Bey b. Kaya ile kasaba-i Beşiktaş’da müteveffâ olan merhûm Memi Ağa’nın karındaşı olan Murad Bey b. Abdullah ile meclis-i şer‘-i şerîfe hâzırân olup ve takrîr-i merâm edip mukaddemâ müteveffâ-yı mezbûrun dokuz yüz yirmi dört sikke filorisi ki yüz on bin sekiz yüz seksen akçe eder kabz olunup hızâne-i âmire’ye teslîm eylemişdim ba‘dehû verâsetin isbât edip geri edâsı lâzım gelmeğin makbûzum olan beytülmâl-i müslimînden verilmek fermân olunmuşidi binâen alâ zâlik Beşiktaş’da müteveffâ olan Mehmed b. Hasan muhallefâtından kırk sekiz bin yedi yüz yetmiş üç akçe ve Kasımpaşa’da fevt olan Sinan b. Abdullah muhallefâtından sekiz bin beş yüz yirmi yedi akçe ve dâhil-i Galata’da vefât eden Murad Ağa muhallefâtından otuz üç bin beş yüz seksen akçe ki cem‘an yüz on bin sekiz yüz seksen akçe olur teslîm eyledim deyicek bi’l-muvâcehe mesfûr Murad Bey dahi meblağ-ı mezbûru [48a] bî-kusûr alıp kabz eyledim deyicek emîn-i mezbûr zimmetinde bir akçe ve bir habbe hakkım kalmadı deyû i‘tirâf edip emîn-i mezbûru kelimât-ı meşrûhasında tasdîk edicek kaziyye bi’t-taleb kayd-ı sicil olundu. Tahrîren fî evâili Saferi’l-hayr li sene semânîn ve tis‘în ve tis‘a mi’e. Şuhûdü’l-hâl: Fahrü’l-cüyûş Rıdvan Çavuş, Mustafa Çavuş b. Abdullah.