Galata Mahkemesi 15 Numaralı Sicil (H. 981 - 1000 / M. 1573 - 1591) cilt: 34, sayfa: 166 Hüküm no: 227 Orijinal metin no: [55a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yorgila v. Dimitri’nin, Ahyolu memlehası iltizamından Hazine-i âmire’ye borçlu olduğu Oldur ki Kasaba-i Eyyûb-i Ensârî’de müteveffâ Mahmud Çavuş b. Murad’ın sagīr oğlu Mehmed Çavuş’a kıbel-i şer‘den vasî nasb olunan işbu hâmilü hâze’l-kitâb Dergâh-ı âlî çavuşlarından fahrü’l-akrân Mehmed Çelebi b. Emir Çelebi Fenerkapısı kurbunda Tahta Minâre mahallesi sâkinlerinden Yorgila v. Dimitri nâm zimmînin mahfil-i kazâya ihzârına memûr olan Dergâh-ı âlî çavuşlarından fahrü’l-akrân diğer Mehmed Çavuş b. Mahmud ihzâr edip vasiyy-i merkūm Mehmed Çavuş mezbûr Yorgila’nın mahzarında takrîr-i da‘vâ kılıp vasî olduğum Mehmed Çavuş’un babası müteveffâ-yı merkūm Mahmud Çavuş’un merkūm Yorgila’nın zimmetinde karz verilmiş on bir kere yüz bin ve on bin akçe hakkı ve alımı vardır altı kere yüz bin akçesi sene dokuz yüz doksan dört Cumâdelûlâsı gurresinde ve altmış bin akçe dahi çuka bahâsından ve bundan mâ‘adâ dört yüz elli bin akçe dahi dokuz yüz seksen sekiz senesinde vâkı‘an Ağustos evvelinde alıp Andrenikoz v. Mihal nâm zimmî Ayoli memlehasını iltizâm ettikde ber vech-i peşîn Hızâne-i âmire için akçe taleb ettiklerinde alıp merkūm Andrenikoz’a verip mezbûr Andrenikoz dahi alıp Hızâne-i âmire’ye ber vech-i peşîn vermiş idi hâlen müteveffâ-yı merkūm Mahmud Çavuş’un mezbûr Yorgila zimmetinde cem‘an on bir kere yüz bin ve on bin akçe hakkı ve alımı vardır vesâyetim hasebiyle taleb ederim ve on bir kere yüz bin ve on bin akçeye mahalle-i merkūmeden Dimitraşko v. Mihal ve Yani v. Dimitri ve Mihal v. Manol ve Kalender v. Mihal mezbûr Yorgila’nın emri ile altı kere yüz bin akçelik beş kere yüz bin ve elli bin akçesine her biri ferden ferdâ meclis-i şer‘de merkūm Yorgila’nın kefîl bi’l-mâlı olup ve dört yüz elli bin akçe ve altı kere yüz bin akçeden bâkī kalan akçeye cem‘an beş kere yüz bin ve altmış bin akçe olur medyûn-ı mezbûr Yorgila’nın emri ile mahalle-i mezbûre sâkinlerinden Muslihiddin b. Abdullah nâm müslim ve Nikola v. Yorgi ve Kostantin v. Yani ve Manol v. Dimitri ve Yorgi v. Yani ve Sevastos v. Yorgi ve Siyonikato v. Apostol ve Mordi v. Yorgi nâm zimmîler meclis-i şer‘de kefîl bi’l-mâl olmuşlardır dedikde merkūm Yorgila’ya suâl olundukda cevâb verip fi’l-vâki‘ zikr olunan on bir kere yüz bin ve on bin akçe Mahmud Çavuş’dan ben aldım deyû ikrâr ettim yedine hüccet-i şer‘iyye verildi lâkin muvâza‘a ile ikrâr eyledim bu husûsda elimde hüccetim vardır zikr olunan akçeyi alıp kabz eylemedim deyicek vasiyy-i merkūm Mehmed Çavuş’dan asl-ı mâlına on bir kere yüz bin ve on bin akçedir kabz edip alıp gittiğine beyyine taleb olundukda udûlden Muslihiddin Efendi el-Kadı ve İbrahim b. Abdullah ve Mustafa b. Muharrem ve Bâli b. Mahmud ve Mehmed b. Hüsam nâm kimesneler şehâdet edip merkūm Yorgila bizim huzûrumuzda târih-i merkūmda zikr olunan altı kere yüz bin akçeyi nakid alıp kabz edip ve altmış bin akçe dahi çuka bahâsından deyn ikrâr edip ve dört kere yüz bin ve elli bin akçe dahi bir def‘a alıp kabz edip iki meclis cem‘an on bir kere yüz bin ve on bin akçeyi merkūm Yorgila esâmîsi mastûre olan küfelâsıyla alıp kabz ve tesellüm etti şâhidiz şehâdet ederiz dediklerinde ba‘de ri‘âyet-i şerâiti’l-kabûl hayyiz-i kabûlde vâki‘ olup zikr olunan on bir kere yüz bin ve on bin akçe merkūm Yorgila’dan vasiyy-i merkūm hükm olunup bu vesîka-i enîka [55b] ketb olunup yed-i tâlibe vaz‘ olundu ki vakt-i hâcetde ihticâc edine. Tahrîren fî evâili Zilhicce min şühûri sene 998. Şuhûdü’l-hâl: Bahşî Efendi b. Hamza el-Kadı, Seyyid Ahmed b. Seyyid Ali el-Mütevellî, Ali Çelebi b. Alemşah, Mustafa b. Ali, Baba Muslihiddin el-İmâm ve gayruhüm mine’l-hâzırîn.