Galata Mahkemesi 15 Numaralı Sicil (H. 981 - 1000 / M. 1573 - 1591) cilt: 34, sayfa: 175 Hüküm no: 239 Orijinal metin no: [58b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Sitti ve Raziye Hâtunların, ölen Emine bt. Rum Ali’nin vârisleri olduğu Oldur ki Mahmiye-i Kostantıniyye mahallâtından Sağır Yahya mahallesi sâkinelerinden olup Sitti Hâtun ve Râziye Hâtun ibnetey Rum Ali b. Abdullah nâm kimesneler meclis-i şer‘de mahmiye-i Galata’da beytülmâl emîni olan Musa Çavuş ve Hasan Bey mahzarında takrîr-i da‘vâ ve tebyîn-i müdde‘â kılıp bundan akdem kazâ-i Rodoscuk’da fevt olan kız karındaşım olan Emine bt. Rum Ali nâm müteveffânın mahmiye-i Galata hâricinde Kasımpaşa mahallâtından Sürûrî Efendi mahallesinde vâki‘ mülk menzilini vârisi yoktur deyû beytülmâl emîni Musa Çavuş vâzı‘ü’l-yed olup kabz eylemişdir müteveffât-ı merkūmenin hâlen merkūme Sitti Hâtun li eb ve üm kız karındaşı mezbûre Râziye Hâtun dahi li üm kız karındaşıyım deyû da‘vâ eyleyip gıbbe’s-suâl ve’l-inkâr ve’l-istişhâd udûl-i müslimînden Fethullah b. Abdülkerim ve Halil b. Receb nâm kimesne meclis-i şer‘a li ecli’ş-şehâde hâzırân olup fi’l-vâki‘ müteveffât-ı mezbûrenin mezbûrân Sitti ve Râziye kız karındaşlarıdır deyû edâ-i şehâdet-i şer‘iyye eylediklerinden sonra mâ vaka‘a kayd olundu. Tahrîren fî evâili Muharremi’l-harâm sene 999. Şuhûdü’l-hâl: Ferruh b. Abdullah, Mehmed b. Abdurrahman, Mehmed b. Mahmud, Mustafa b. Seydi.