Galata Mahkemesi 15 Numaralı Sicil (H. 981 - 1000 / M. 1573 - 1591) cilt: 34, sayfa: 177 Hüküm no: 245 Orijinal metin no: [59b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ölen Hasan Odabaşı b. Abdullah’ın, cariyesi Mülâyim’i karısı Aynî Hâtun bt. Abdülmennân’a hibe ettiği Oldur ki Bundan akdem mahmiye-i Galata mahallâtından Bereketzâde mahallesi sâkinlerinden olup Talende’den gelirken Kuruçeşme nâm mevzi‘de fevt olan Hasan Odabaşı b. Abdullah’ın zevcesi fahrü’l-muhadderât Aynî Hâtun bt. Abdülmennân’ın husûs-ı âti’z-zikri da‘vâya vekîl olup vekâleti Ali b. Abdurrahman ve Hüsrev b. Abdullah nâm kimesneler şehâdetiyle sâbite olan işbu hâmilü’l-hurûf fahrü’l-a‘yân Sinan Bey b. Mahmud nâm kimesne meclis-i şer‘-i şerîfde mahmiye-i merkūmede beytülmâl emîni olan Musa Çavuş b. Kaya ve ortağı Hasan Bey b. Abdullah ve kâtibi Ali Çelebi b. Mustafa nâm kimesneler mahzarında takrîr-i da‘vâ eyleyip müteveffâ-yı mezbûr Hasan Odabaşı hâl-i hayâtında ve kemâl-i sıhhatinde orta boylu, buğday tenli, Kıbrısiyyü’l-asl, Mülâyim nâm câriyeyi sagīreliği hâlinde zevcesi merkūme Aynî Hâtun’a hibe-i sahîha ile hibe ve temlîk edip ol dahi merkūme câriyeyi kabûl ve kabz ve zabt ve tasarruf edip iki bin akçe hibeye ivaz vermişdir vekâletim hasebiyle câriye-i merkūmeyi taleb eylerim dediklerinde gıbbe’s-suâl ve’l-inkâr ve’l-istişhâd udûl-i müslimînden fahrü’s-sâdât es-Seyyid Receb b. Hüseyin ve Baba Zünnûn b. Hüseyin nâm kimesneler meclis-i şer‘a li ecli’ş-şehâde hâzırân olup fi’l-vâki‘ müteveffâ-yı mezkûr hâl-i hayâtında zevcesi merkūme Aynî Hâtun’a câriye-i mezbûre[yi] sagīreliği hâline hibe ve temlîk edip ol dahi merkūme câriye kabûl ve kabz ve tasarruf edip iki bin akçe hibeye ivaz verip teslîm etmişdir zikr olunan câriye mezbûre Aynî Hâtun’un mâl-ı mevhûbesidir deyû edâ-i şehâdet-i şer‘iyye eyleyip ba‘de’t-ta‘dîl ve’t-tezkiyye şehâdetleri ba‘de ri‘âyeti şerâiti’l-kabûl makbûle olup bu vesîka-i enîka ber sebîl-i temessük ketb olundu. Tahrîren fî evâsıtı Muharremi’l-harâm sene 999. Şuhûdü’l-hâl: Mustafa Çavuş b. Hüseyin, Ahmed b. Hüseyin, Müstedâm Çavuş b. Abdullah, Ali Çavuş b. Abdullah, Abdülkādir b. el-Hâc ( ), Hüseyin b. Mustafa, İsa Halîfe b. Abdurrahman, Hüsrev b. Abdülhakir ve gayruhüm mine’l-hâzırîn.