Galata Mahkemesi 15 Numaralı Sicil (H. 981 - 1000 / M. 1573 - 1591) cilt: 34, sayfa: 180 Hüküm no: 252 Orijinal metin no: [60b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Bâli b. Abdullah’ın evini evlatlarına vakf ettiği satılamayacağı Mehmed b. Mehmed nâm kimesne mahfil-i kazâda Mustafa b. Ali nâm kimesne mahzarında üzerine takrîr-i da‘vâ edip mahmiye-i Galata’da Yolcuoğlu mahallesinde vâki‘ olup inde’l-cîrân ma‘lûmü’l-hudûd olan menzili cedd-i a‘lâm olan Bâli b. Abdullah evlâdına ve evlâd u evlâdına neslen ba‘de neslin batnen ba‘de batnin vakf eylemişdir ben dahi mezbûrun evlâdından Mehmed b. Mehmed’in sulbî oğluyum hâlen mezbûr Mustafa menzil-i mezbûru mülkiyyet üzre tasarruf eder âhara bey‘ etmek ister suâl olunsun dedikde gıbbe’s-suâl mezbûr Mustafa vakfiyyet-i mezkûre inkâr ile cevâb vericek mezbûr Mehmed’den da‘vâsına mutâbık beyyine taleb olundukda udûl-i müslimînden el-Hâc Mehmed b. el-Hâc Hüseyin ve eş-Şeyh Ahmed b. eş-Şeyh Mehmed nâm kimesneler meclis-i şer‘a li ecli’ş-şehâde hâzırân olup fi’l-vâki‘ menzil-i mezbûru merkūm Bâli evlâdına ve evlâd u evlâdına ba‘dehû fukarâ-i Medîne-i münevvere’ye vakf eylemişdir ve mezbûr Mehmed dahi vakf-ı mezbûrun evlâdından Mehmed’in sulbî oğludur bu husûsa şâhidleriz şehâdet dahi ederiz deyû her birisi ale’t-tafsîl edâ-i şehâdet-i şer‘iyye ettiklerinde şehâdetleri ba‘de’t-ta‘dîl hayyiz-i kabûlde vâki‘ olup mâ hüve’l-vâki‘ ketb olunup yed-i tâlibe vaz‘. Tahrîren fî evâili Muharrem sene 999. Şuhûdü’l-hâl: Hasan b. Hüseyin, Abdülkādir b. Hacı, Sinan Bey b. Mahmud, Mahmud b. İsmail, Ömer Efendi b. Yusuf el-Müderris, Mehmed b. Bayezid.