Galata Mahkemesi 15 Numaralı Sicil (H. 981 - 1000 / M. 1573 - 1591) cilt: 34, sayfa: 184 Hüküm no: 258 Orijinal metin no: [62a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ölen Şaban b. Ahmed’in, karısı Havva Hâtun b. el-Hâc Mehmed’e olan mehir ve borcunun vasiyy-i muhtardan vekil tarafından istenildiği Galata hâricinde Kasımpaşa mahallâtından Yahya Kethüdâ mahallesinde fevt olan Şaban b. Ahmed’in zevcesi olan Havva Hâtun bt. el-Hâc Mehmed husûs-ı âti’z-zikrin da‘vâ ve kabzına vekîl olup vekâleti Hamza b. Ali ve Mehmed b. Hasan nâm kimesneler şehâdetleriyle sâbite olan Mehmed b. Mustafa meclis-i şer‘-i şerîfde müteveffâ-yı mezbûrun sülüs malının tenfîzi için vasiyy-i muhtâr olan el-Hâc Mehmed b. Şaban mahzarında takrîr-i da‘vâ eyleyip müvekkilem mezbûre Havva’nın zevci müteveffâ-yı mezbûr zimmetinde mehr-i müeccel altı yüz akçe ve karz-ı hasen iki bin dört yüz akçe cem‘an üç bin akçe olup müteveffâ-yı mezbûrun muhallefâtından meblağ-ı merkūmu vekâletim hasebiyle taleb eylerim dedikde gıbbe’s-suâl ve’l-inkâr ve’l-istişhâd udûlden Hasan b. Mehmed ve Ahmed b. Veli nâm kimesneler meclis-i şer‘a li ecli’ş-şehâde hâzırân olup fi’l-vâki‘ müteveffâ-yı mezbûr hâl-i hayâtında ve kemâl-i sıhhatinde bizim huzûrumuzda zevcesi mezbûre Havva’ya iki bin dört yüz akçe ve mehr-i müeccel altı yüz akçe cem‘an üç bin akçe deynim vardır deyû ikrâr ve i‘tirâfına şâhidleriz şehâdet dahi eyleriz deyû edâ-i şehâdet-i şer‘iyye eyleyip ba‘de’t-ta‘dîl ve’t-tezkiyye şehâdetleri hayyiz-i kabûlde vâki‘ olup mâ vaka‘a kayd şüd. Fi’t-târihi’l-mezbûr. Şuhûdü’l-hâl: Hüseyin Bey b. Abdullah, Mehmed Reis b. Veli, Mehmed b. Mustafa, Hüsrev b. Abdullah, Mustafa b. Bâli.