Galata Mahkemesi 15 Numaralı Sicil (H. 981 - 1000 / M. 1573 - 1591) cilt: 34, sayfa: 191 Hüküm no: 274 Orijinal metin no: [65b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kasım’ın oğullarının, babalarının azatlısı Cafer hakkında açtıkları davadan vazgeçtikleri Oldur ki Kasım nâm kimesnenin sulbî oğulları olan Ahmed Bey ve Mehmed Bey ve Mustafa Bey nâm kimesneler mahfil-i şer‘-i kavîmde bundan akdem mahmiye-i Galata’da vefât eden Kara Süleyman nâm kimesnenin sulbî oğlu Cafer nâm kimesnenin sulbiye kızı Râziye nâm sagīresi fevt oldukda mezbûre Râziye’nin kız karındaşı olan Kerime’nin vasiyy-i muhtâr olan işbu hâmilü’l-kitâb fahrü’l-emâsil ve’l-akrân kapıcı Mustafa b. Abdullah nâm kimesne mahzarında ikrâr ve i‘tirâf eyleyip sagīre-i mezbûrenin dedesi olan mezkûr Cafer babamız mezbûr Kasım’ın mu‘takıdır deyû da‘vâ etmiş idik el-hâletü hâzihî sagīre-i mezbûrenin metrûkâtından akçe ve esbâb ve emlâk her ne ise zikr olunan meblağa müte‘allik olan da‘vâdan fâriğ olduk eğer bir dahi da‘vâ ve nizâ‘ sâdır olursa inde’l-hükkâmi’l-kirâm mesmû‘a ve makbûle olmaya dedikde mukırrûn-ı mezbûr Ahmed ve Mehmed ve Mustafa’nın vech-i meşrûh üzre olan ikrârlarını mezbûr Mustafa Bey vicâhen tasdîk ve şifâhen tahkīk eyledikde mâ vaka‘a kayd şüd. Tahrîren fî evâsıtı Rebî‘ilâhir sene 999. Şuhûdü’l-hâl: Ali b. Sinan, Mustafa Çelebi b. Mehmed, Behram b. Mehmed, Piyâle Bey b. Abdullah, ve Abdullah b. el-Hâc Abdülkādir Halîfe, Musa b. İshak, kürkçü Hasan [b.] Bâli, Mahmud b. Ahmed Dîdebân, es-Seyyid İlyas b. es-Seyyid Ali, İbrahim b. Hüseyin, Mehmed b. Mustafa, Ali b. Bâli, Mahmud b. Abdullah, Yusuf Reis b. Abdullah, Mehmed Bey b. Ahmed ve gayruhüm mine’l-hâzırîn.