Galata Mahkemesi 15 Numaralı Sicil (H. 981 - 1000 / M. 1573 - 1591) cilt: 34, sayfa: 192 Hüküm no: 276 Orijinal metin no: [66a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Muharrem b. Şeyhi’nin sefine bahasından Şükür Reis b. Veys’deki alacağını tahsil ettiği Muharrem b. Şeyhi nâm kimesnenin sefîne bahâsından Şükür Reis b. Veys nâm kimesne zimmetinde olan yedi bin beş yüzü da‘vâ ve kabza ve ibrâ ve sulha vekîl olup vekâleti bimâ hüve tarîkü’s-sübût şer‘an sâbit olan el-Hâc Abdi b. Halil mahfil-i kazâda mezbûr Şükür Reis’den zikr olunan meblağ bi’l-vekâle taleb eyledikde mezbûr Şükür Reis cevâb verip dedi ki benim zimmetimde merkūm Şeyhi’nin yedi bin akçesi vardır lâkin meblağ-ı mezbûru Mehmed Çelebi nâm kimesneye veresin dediği ecilden verip dururun dedikde merkūm Mehmed Çelebi’yi meclis-i şer‘a ihzâr eyleyip vâki‘ hâl suâl olundukda ikrâr eyleyip aldım lâkin dükkânımdan sirkat olundu dedikde mezbûr Mehmed Çelebi’den meblağ-ı mezbûru hıyânet eylemediğine nice müslümanlar şehâdet eyledikde meblağ-ı mezbûru dört bin akçeye sulh edip meblağ-ı mezbûru bi’t-tamâm alındıkda mâ vaka‘a kayd şüd. Tahrîren fî evâsıtı Rebî‘ilâhir (…). Şuhûdü’l-hâl: Hüsrev b. Abdullah, Ali b. Bâli, Mehmed b. Mustafa, Mehmed b. Mustafa, Ali b. Mustafa, Mehmed b. Bâli, Musli b. Ali el-Muhzır.