Galata Mahkemesi 15 Numaralı Sicil (H. 981 - 1000 / M. 1573 - 1591) cilt: 34, sayfa: 196 Hüküm no: 284 Orijinal metin no: [68a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa b. el-Hâc Hamza’nın mülk bağının vârisler arasında paylaştırıldığı Bundan akdem mahmiye-i Galata mahallâtından el-Hâc Hüsrev mahallesinde müteveffâ olan Mustafa b. el-Hâc Hamza’nın vârislerinden vâlidesi Emine Hâtun ve müteveffâ-yı mezbûrun oğluna vasî olan karındaşı Kerim Bey meclis-i şer‘de takrîr-i kelâm ve tebyîn-i merâm edip dedi ki müteveffâ-yı mezbûrun bundan akdem mahmiye-i Üsküdar kazâsına tâbi‘ İstavroz nâm mevzi‘de vâki‘ olan Terzibaşı ve el-Hâc Nasuh ve Behram nâm …? Vasil nâm kimesne mülkleriyle ve tarîk-i âm ile mahdûd bir bâb fevkānî ev önünde sofa ve hücre ve bi’r-i mâ’ ve kenîf ve eşcâr-ı müsmire ve gayr-ı müsmire[yi] müştemil ve muhtevîdir zikr olunan mülk bağ müteveffâ-yı mezbûr el-Hâc Hamza fevt oldukdan sonra oğlu müteveffâ-yı merkūm fevt olunca mâbeynimizde tevzî‘ ve taksîm olunmayıp kalmışdır el-hâletü hâzihî zikr olunan mülk içinde olan hisse-i şer‘iyyemizin zâhir olunmasını taleb eylerim dedikde hâssa mi‘mârlarından üstâd Cafer ve üstâ[d] Sinan ve cemm-i gafîr ve cemâ‘at-i kesîre ile varılıp bennâ zirâ‘ıyla yirmi altı bin zirâ‘ olup zikr olunan bağı tahmîn-i sahîh ile takvîm edip altmış bin akçeye mahdûd-ı mezbûrun nısf-ı şâyi‘i ki bennâ zirâ‘ıyla tûlen karârı on dört bin zirâ‘ olur içinde eşcâr-ı müsmire ve gayrı müsmiresiyle ve fevkānî ve tahtânî ev önünde sofa ve bi’r-i mâ’ ve kenîf zikr olunan bağın mâbeyninde olan üç tûl zirâ‘ı mukābelesinde sınır çekip kur‘a ile müteveffâ-yı mezbûrun oğlu Mustafa’ya düşüp ve nısf-ı âharı dahi on iki bin zirâ‘ bahçe eşcâr-ı müsmire ve gayr-ı müsmiresiyle müteveffâ-yı mezbûra intikāl edip müteveffâ-yı mezbûrun oğlu Mustafa dahi fevt olmağla oğlu Mehmed nâm sagīreye intikāl edip meblağ-ı merkūmdan müteveffâ el-Hâc Hamza’nın zevcesi merkūme Emine’ye sümün hisse-i şer‘iyye yedi bin altı yüz yetmiş bir akçe ihrâc olundukdan sonra mâ vaka‘a kayd olundu. Tahrîren fî evâili şehri Cumâdelûlâ sene 999. Şuhûdü’l-hâl: Hamza Bey b. Abdullah, Mustafa b. Abdullah, Şaban b. Mustafa, Yusuf b. Hasan, Mustafa b. Murad, Ömer b. Abdullah, Nurullah b. Murad?, Ali b. Bâli ve gayruhüm mine’l-hâzırîn.