Galata Mahkemesi 15 Numaralı Sicil (H. 981 - 1000 / M. 1573 - 1591) cilt: 34, sayfa: 226 Hüküm no: 338 Orijinal metin no: [80a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Emine bt. Ali’nin, ölen el-Hâc Kemal b. Mehmed’den alacaklı olduğu Kostantıniyye’de görülen da‘vâdır Fahrü’l-muhadderât Emine bt. Ali nâm hâtun tarafından husûs-ı âti’z-zikre da‘vâ ve kabzına vekîl olup vekâleti bimâ hüve tarîkü’s-sübût şer‘an sâbite olan işbu hâmilü’l-kitâb fahrü’l-akrân Yahya Çelebi b. Mehmed nâm kimesne meclis-i şer‘-i şerîfde bundan akdem mahmiye-i Kostantıniyye mahallâtından Mercan Ağa mahallesinde fevt olan el-Hâc Kemal b. Mehmed nâm müteveffânın li eb ve üm karındaşı İsa b. Mehmed ve vasiyy-i muhtârı olan Seydi b. Yusuf nâm kimesneler mahzarında takrîr-i kelâm ve tebyîn-i merâm kılıp dedi ki, müvekkilem mezbûre Emine’nin müteveffâ-yı mezbûr zimmetinde karz-ı şer‘îden yirmi bin akçe hakkı vardır. Hâlâ muhallefâtından taleb eylerim dedikde gıbbe’s-suâl ve’l-inkâr ve’l-istişhâd udûl-i müslimînden ve sikāt-ı muvahhidînden Mehmed b. Ali el-Müezzin ve Ramazan b. Hasan nâm kimesneler meclis-i şer‘a li ecli’ş-şehâde hâzırân olup fi’l-vâki‘ müteveffâ-yı mezbûr hâl-i hayâtında ve kemâl-i sıhhatinde kayınanam mezbûre Emine’ye karz-ı şer‘îden yirmi bin akçe deynim vardır deyû i‘tirâf ve ikrârına şâhidleriz, şehâdet dahi eyleriz deyû edâ-i şehâdet-i şer‘iyye eyleyip ba‘de’t-ta‘dîl ve’t-tezkiyye şehâdetleri hayyiz-i kabûlde vâki‘ oldukdan sonra mûcebiyle hükm olundu. Tahrîren fî evâsıtı Cemâziyelâhir sene 999. Şuhûdü’l-hâl: Yahya b. Ebûbekir el-Mu‘allim, Mehmed b. Hacı Halîfe, Sinan Efendi b. Nasuh, Süleyman Çavuş b. Abdullah, Mustafa b. Ali el-Muhzır, Mehmed b. Mustafa ve gayruhüm.