Galata Mahkemesi 15 Numaralı Sicil (H. 981 - 1000 / M. 1573 - 1591) cilt: 34, sayfa: 232 Hüküm no: 348 Orijinal metin no: [82b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ölen el-Hâc Kemal Bey b. Mehmed’den alacaklı olanların alacaklarından vazgeçtiği Bundan akdem mahmiye-i Kostantıniyye’de Mercan Ağa mahallesinde fevt olan el-Hâc Kemal Bey b. Mehmed nâm müteveffânın zevcesi Fâtıma bt. Mezid tarafından vekîl olan Yahya b. Mehmed ve müteveffâ-yı mezbûrun dâyinlerinden kayınanası Emine bt. Saat bi’l-asâle ve’l-vekâle mahfil-i kazâda işbu hâmilü’l-kitâb müteveffâ-yı mezbûrun li eb ve üm karındaşı İsa b. Mehmed mahzarında ikrâr ve i‘tirâf edip dedi ki müteveffâ-yı mezbûr zimmetinde karz-ı şer‘îden yirmi bin akçe ve mehr-i müeccel yirmi bin akçe ve on bin akçe dahi karz-ı şer‘îden olup ve mezbûre Fâtıma dahi müteveffâ-yı mezbûrun nukūdundan bana âid olan hisse-i şer‘iyyeden hâsıl olan akçeye müte‘allik mezbûrlar ile da‘vâ ve nizâ‘ vâki‘ olmuş idi. Hâlâ dâyinlerine muslihûn-ı mütevassıtûn “es-sulhu seyyidü’l-hükkâm ve senedü’l-hükkâm” fehvâsıyla amel olunup mezbûre Fâtıma ve Emine Hâtun ve zikr olunan da‘vâ eyledikleri akçeden fâriğ olup ve vasiyy-i mezbûr ve karındaşı merkūm İsa dahi müteveffâ-yı mezbûrun evinde olan esbâbdan ve binâdan ve sâir husûs[lardan] ibrâ-i âm ile ibrâ ve iskāt-ı tâm ile iskāt olup mezbûre Fâtıma’ya da‘vâ eylediği akçe mukābelesinde bedel-i sulh olan on beş bin akçe vermek üzre ibrâ ve iskāt olunup ve müteveffâ-yı mezbûrun dahi evinde olan câriyeye müte‘allik tarafeynden da‘vâ ve nizâ‘ vâki‘ olursa inde’l-hükkâm mesmû‘a ve makbûle olmaya dedikde ikrârları tahrîr olundu. Tahrîren fî evâili Cumâdelâhire sene 999. Şuhûdü’l-hâl: Ali b. Yusuf, Osman Efendi b. İmran el-Müderris, el-Hâc Hüseyin [b.] Refet, Maden b. Hasan, Mehmed b. Mustafa, Yahya b. Yahşi, Rıdvan b. Abdullah, Ali b. Bâli, Musli b. Ali, Hüsrev b. Abdullah, İlyas b. Mustafa, İbrahim b. Hasan ve gayruhüm mine’l-hâzırîn. [82b-2] İnteheti’l-vekāyi‘ fî zemeni fahrü’l-ulemâ ve efdalü’l-fuzalâ Hüseyin Efendi el-Kadı’l-askeri’l-mansûre bi Rumeli el-ma‘mûre. Harrerehü’l-fakīr Hidâyetullah b. Mahmud.