Galata Mahkemesi 15 Numaralı Sicil (H. 981 - 1000 / M. 1573 - 1591) cilt: 34, sayfa: 261 Hüküm no: 406 Orijinal metin no: [92a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ölen el-Hâc Bekir b. Mustafa Reis’in terekesinin vârisler arasında paylaşıldığı Sebeb-i tahrîr-i kitâb-ı şer‘î budur ki Mahmiye-i Galata’ya tâbi‘ Kasımpaşa sâkinlerinden fevt olan merhûm ve mağfûrun-leh el-Hâc Bekir er-Reisü’s-sultânî b. Mustafa er-Reisü’s-sultânî nâm müteveffânın vereselerinden sagīresi Âişe’nin vasiyy-i şer‘îsi olan li eb ve üm karındaşı Mehmed er-Reisü’s-sultânî b. Mustafa el-mezkûr ve zevcesi Rahime bt. Mustafa ve babası Mustafa er-Reisü’s-sultânî meclis-i şer‘-i şerîf-i nebevî ve dîvân-ı münîf-i Ahmedî’ye hâzırûn olduklarında Rahime-i merkūme bi’l-muvâcehe ikrâr ve takrîr edip merhûme zevcemin muhallefâtı bey‘ olunup cümle beş bin beş yüz mikdârı akçe olup benim bi hesâbi’ş-şer‘ sâbit ve zâhir olan on altı bin akçe mehr-i müeccelim ve sâir düyûnu ziyâde olmak ile asıl malını isti‘âb etmeğin taksîm-i guremâ olunup benim hisseme ve hakkıma düşen akçeyi bi’t-tamâm ve’l-kemâl alıp kabz u kabûl ettim ve sâir merhûmâna âid ve râci‘ olan hakkımdan ve gayrı da‘vâ ve nizâ‘ ve husûmât-ı şer‘iyyemden mezbûr vasînin ve gayrı vârislerin zimmetlerini ibrâ ve iskāt ettim vechen mine’l-vücûh husûs-ı mezbûra müte‘allik da‘vâ ve talebim yoktur dedikde ve Mustafa Reis dahi kezâlik merhûmun kendi deyni mukābelesinde sulh olunup verilen akçeden hisse-i şer‘iyyeme düşen on bir bin akçe hakkımı bi’t-tamâm ve’l-kemâl alıp kabz ve kabûl ettiğimden sonra vasiyy-i mezkûr Mehmed Reis’in ve Râbia’nın zimmetlerini min külli’l-vücûh da‘vâ ve nizâ‘ımdan ve sâir husûmâtdan ibrâ ve iskāt ettim min ba‘d da‘vâ ve talebim yoktur dediklerinde vech-i meşrûh üzre ikrâr ve takrîrlerin Mehmed Reis-i mesfûr ve Râbia kabûl ve tasdîk ettiklerinde vech-i merkūm üzre hakīkat-i hâl kayd ve tahrîr olunup sûret yed-i tâlibine kayd olundu. Tahrîren fî evâhiri (…) 999.