Galata Mahkemesi 15 Numaralı Sicil (H. 981 - 1000 / M. 1573 - 1591) cilt: 34, sayfa: 280 Hüküm no: 439 Orijinal metin no: [99b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Şaban Reis b. Abdullah’ın, kölesi Mikel Karduzer’i Kerolemo’ya sattığı Galata’ya tâbi‘ Tophâne sâkinlerinden fahrü’l-akrân Reis-i sultânî zümresinden Şaban Reis b. Abdullah, Efrenciyyü’l-asl Kerolemo nâm kâfir ile meclis-i şer‘-i şerîfe hâzırân olduklarında mezkûr Şaban Reis merkūm Kerolemo mahzarında takrîr-i kelâm ve tafsîl-i merâm kılıp hâlâ taht-ı tasarrufumda uzun boylu, gendüm-gûn, ezrakü’l-ayneyn, efrakü’l-hâcibeyn, Efrenciyyü’l-asl, başında eser-i cerâhati olup Mikel Karduzer ismiyle müsemmâ olan abd-i memlûkü işbu merkūm Kerolemo’ya otuz iki bin nakd-i râyic fi’l-vakt akçeye bey‘ edip kabz-ı semen ve teslîm-i mebî‘ edip min ba‘d benim kıbelimden abd-i mezbûr hakkında alâka ve nizâ‘ım kalmadı. Nice bilirse öyle etsin dedikde mukırr-ı mezbûrun vech-i meşrûh üzre bey‘ ve şirâya ikrâr ve takrîrin mukarrun-lehü’l-mezkûr Kerolemo vicâhen ve şifâhen kabûl ve tasdîk ettikden sonra sıhhat ve bey‘ ve şirâya hükm olunup bu vesîka-i enîka alâ mâ hüve’l-hakīka ketb ve terkīm olunup ber sebîlü’t-temessük yed-i tâlibe vaz‘ ve def‘ olundu. Lede’l-hâce müzekkir-i mâ cerâ olup vakt-i hâcetde ihticâc edine. Cerâ zâlike ve hurrire tahrîren fî evâili şehri Zilka‘deti’l-mükerreme sene 999. Şuhûdü’l-hâl: Hürrem Bey b. Abdullah ez-Za‘îm, Ahmed Bey b. Abdullah el-Cündî, el-Hâc Memi b. Abdullah er-Reis, Mustafa b. Ali ve gayruhüm.