Galata Mahkemesi 15 Numaralı Sicil (H. 981 - 1000 / M. 1573 - 1591) cilt: 34, sayfa: 325 Hüküm no: 501 Orijinal metin no: [118b-3, Arapça] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Sâliha bt. Hızır’ın vasiyeti Hâric-i mahmiye-i Galata’da vâki‘ Tahta Kadı mahallesi imâmı Hasan Halîfe b. Kasım ve yine mahalle-i mezkûreden Osman b. Rıdvan nâm kimesneler meclis-i şer‘-i şerîf ve mahfil-i dîn-i münîfe hâzırân olup mahalle-i merkūmede bundan akdem fevt olan merhûme Sâliha bt. Hızır’ın muhallefâtına vâzı‘ü’l-yed olan ve husûs-ı âti’z-zikri inkâr eden mahmiye-i Galata’da vâki‘ beytülmâl-i hâssın emîni Musa Çavuş b. Kaya mahzarında, müteveffât-ı merhûmenin zevci, hâmil-i hâze’l-kitâb Piyâle b. Abdürrahim’den sâdır olan da‘vâ-yı sahîha-i şer‘iyyede gıbbe’l-istişhâd şöyle şehâdet ettiler ki, müteveffât-ı mezkûre hâl-i hayâtı ve nefâz-ı tasarrufâtında râyicü’l-vakt altı bin akçelik sülüs-i malını techîz ve tekfîni ile kabri başında tilâvet-i Kur’ân’a, eyyâm-ı mu‘tâdede fukarâ için tabh-ı ta‘âma ve sâir vücûh-i hayrâta vasiyyet etti ve şer‘ ve maslahat îcâbı vasiyyetlerinin tenfîzi için müdde‘î-i mezbûru vasiyy-i muhtâr seçdi. O da vesâyet-i mezbûreyi kabûl edip hizmet-i lâzımesini edâyı müte‘ahhid oldu. Şehâdetleri ba‘de ri‘âyeti şerâiti’l-kabûl inde’ş-şer‘ makbûl ve mû‘teber olmağın hâkim şehâdetleri mûcebince meblağ-ı merkūmun müteveffât-ı merhûmenin cemî‘ muhallefâtının sülüsünden edâsına hükm etti. Müdde‘î-i mezkûr, meblağ-ı mezkûru emîn-i merkūm yedinden ahz ü kabz ettiğini ikrâr etti. Vâki‘ ikrâr, emîn-i mezkûr kıbelinden bi’l-muvâcehe tasdîk edildi. Cerâ zâlike ve hurrire fî evâhiri Zilhicceti’ş-şerîfe sene 999. Şuhûdü’l-hâl: Hasan b. Abdullah, Receb b. İsmail, üstâd Ali b. Mehmed, Hasan Bey b. Abdullah, el-Hâc Ali b. Abdullah ve gayruhüm.