Galata Mahkemesi 20 Numaralı Sicil (H. 1005 - 1007 / M. 1596 - 1599) cilt: 35, sayfa: 62 Hüküm no: 31 Orijinal metin no: [4a-4, Arapça] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Abdi Bey’in, el-Hâc Hüseyin eytâmına borcu olduğu Mevlânâ Mehmed b. Alâaddin el-Hatîb ve Şeyh Mehmed Bey b. Şeyh Ahmed ve el-Hâc Hüseyin b. Ahmed nâm kimesneler meclis-i şer‘-i şerîfe hâzırûn olup, hâric-i mahmiye-i Galata’da vâki‘ Müeyyedzâde mahallesinde bundan akdem fevt olan merhûm Abdi Bey b. Mahmud’un eytâmına vasiyy-i şer‘î olan Mustafa b. Ali nâm hasm-ı câhid mahzarında, merhûm el-Hâc Hüseyin’in eytâmına vasiyy-i şer‘î olan hâmil-i hâze’l-kitâb el-Hâc Kasım b. Abdullah’dan sâdır olan da‘vâ-yı sahîha-i şer‘iyyede gıbbe’l-istişhâd şöyle şehâdet ettiler ki müteveffâ-yı mezbûr hâl-i hayâtı ve kemâl-i sıhhatinde bizim yanımızda ve katımızda, karz-ı hasen-i şer‘î cihetinden ve eytâm-ı mezbûre malından, üzerinde ve zimmetinde râyicü’l-vakt on altı bin akçe ve müşterâ-yı makbûz çuka bahâsından da iki bin akçe lâzımü’l-edâ ve vâcibü’l-kazâ deyni olduğunu ikrâr ve i‘tirâf etti. Karz dışındaki mikdâr, 998 senesi gurre-i Zilhiccesi’nden bir sene tamâmına müecceldir. Vasiyy-i mezbûra meblağ-ı merkūmu kısmen veya tamâmen bi vechin mine’l-vücûh ve sebebin mine’l-esbâb almadığına dâir yemîn verilmesinden ve şâhidlerin şehâdetlerinin ba‘de ri‘âyeti şerâiti’l-kabûl inde’ş-şer‘ makbûl ve mu‘teber olmasından sonra şehâdetleri mûcebince meblağ-ı mezbûrun müteveffâ-yı mesfûrun muhallefâtından edâsına hükm edildi. Cerâ zâlike ve hurrire fi’l-yevmi’s-sâmin ve’l-ışrîn min Cemâziyelâhir sene hamse ve elf. Şuhûd: Ahmed Çelebi b. Abdurrahman, el-Hâc Hüseyin b. Abdullah, Ömer Çelebi b. Pîrî, el-Hâc Ali b. Abdullah, Kasım Bey b. Abdullah, el-Hâc Yusuf b. el-Hâc Ömer er-Râcil ve gayruhüm