Galata Mahkemesi 20 Numaralı Sicil (H. 1005 - 1007 / M. 1596 - 1599) cilt: 35, sayfa: 82 Hüküm no: 59 Orijinal metin no: [7b-5, Arapça] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Osman’ın Ömer adlı oğluna borcu olduğu Cafer b. Abdullah ve Mustafa b. Abdullah nâm kimesneler meclis-i şer‘a hâzırân olup, mahmiye-i Galata mahallâtından Bereketzâde mahallesinde bundan akdem fevt olan merhûm Osman’ın Âişe nâm sagīre kızına kıbel-i şer‘den mansûb vasî olan Şâdıman Hâtun bt. Abdurrahman nâm hasm-ı câhid mahzarında, mahalle-i mezbûrede vefât eden Yasemin bt. Abdullah nâm hâtunun Ömer b. Osman nâm sagīr oğluna vasiyy-i şer‘î olan hâmil-i hâze’l-kitâb Mehmed b. Veli’den sâdır olan da‘vâ-yı sahîha-i şer‘iyyede gıbbe’l-istişhâd şöyle şehâdet ettiler ki müteveffâ-yı mezbûr hâl-i hayâtı ve kemâl-i sıhhatinde bizim yanımızda ve katımızda sagīr-i mezbûra karz cihetinden lâzımü’l-edâ ve vâcibü’l-kazâ râyicü’l-vakt sekiz bin akçe deyni olduğunu ikrâr ve i‘tirâf etti. Şehâdetleri ba‘de ri‘âyeti şerâiti’l-kabûl inde’ş-şer‘ makbûl ve mu‘teber olmağın mûcebince meblağ-ı mezbûrun müteveffâ-yı merkūmun muhallefâtından edâsına hükm edildi. Cerâ zâlike ve hurrire fi’l-yevmi’r-râbi‘ ve’l-ışrîn min şehri Ramazâni’l-mübârek sene hamse ve elf. Şuhûd: Mevlânâ Mustafa Çelebi b. Ali, Ahmed b. Hüseyin, Mehmed b. Abdullah, Mehmed b. Budak, Mustafa Çelebi b. Ahmed ve gayruhüm