Galata Mahkemesi 20 Numaralı Sicil (H. 1005 - 1007 / M. 1596 - 1599) cilt: 35, sayfa: 97 Hüküm no: 84 Orijinal metin no: [10b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mirasçıların terekeyi kendi aralarında paylaştığı Hazret-i Ebî Eyyûb-i Ensârî -radiye anhu rabbühü’l-Bârî-de Baba Haydar mahallesinde sâkin olup Eğri seferinde şehîd olan merhûm Şeyh Hızır Efendi b. Şucâ‘’ın verâseti zevce-i metrûkesi Nâime Hâtun bt. Ahmed’e ve sulbî kebîr oğulları el-Hâc Mehmed ve Şeyh Mehmed’e ve sulbiye kebîre Kerime ve Sâliha’ya münhasıra oldukdan sonra mezbûre el-Hâc Mehmed ve Şeyh Mehmed ve Nâime ve Sâliha meclis-i şer‘de bâ‘isetü’l-kitâb mezbûre Kerime muvâcehesinde her biri takrîr-i kelâm edip mûrisimiz merhûm-ı merkūmun akār ve menkūl kıymetinden olan cümle muhallefâtı beynimizde kısmet olundukda her birimize isâbet eden hisse-i şâyi‘amızı sâir muhallefâtdan alıp muhallefât-ı mezbûreden olup mahalle-i mezbûrede vâki‘ bir tarafı Beyzâde mülkü ve bir tarafı Âbide Hâtun vakfı ve iki tarafı tarîk-i âm ile mahdûd üç bâb fevkānî ve üç bâb tahtânî odaları ve ahırı ve kileri ve sofaları ve fırını ve bi’r-i mâyı ve cüneyneyi hâvî olan menzili mezbûre Kerime’nin kırk sekiz sehimden yedi sehim hisse-i şer‘iyyesi mukābelesinde mezbûre Kerime’ye ta‘yîn ve tahsîs olunup ol dahi bi’t-terâzî kabûl ve kabz eyledi min ba‘d mezbûre Kerime’nin menzil-i mezkûr mülk-i mahzıdır, bizim alâka ve medhalimiz yoktur dediklerinde gıbbe’t-tasdîki’ş-şer‘î mâ vaka‘a bi’t-taleb ketb olundu. Cerâ fî evâili Rebî‘ilevvel sene sitte ve elf. Şuhûd: Kara Hasan Efendi, Mahmud Beşe b. ( ), Ali Efendi b. el-İmâm, Mehmed b. Ferruh el-Müezzin, el-Hâc Ahmed b. el-Kâtib, Rıdvan Dede b. Abdullah, Mehmed Çelebi b. Mahmud er-Râcil ve gayruhüm