Galata Mahkemesi 20 Numaralı Sicil (H. 1005 - 1007 / M. 1596 - 1599) cilt: 35, sayfa: 128 Hüküm no: 123 Orijinal metin no: [16b-4, Arapça] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Rahime Hatun’un mehir alacağı Abdurrahman b. Mehmed ve Abdülkerim b. Mehmed nâm kimesneler meclis-i şer‘-i şerîfe hâzırân olup, mahmiye-i Galata müzâfâtından Kasımpaşa kasabası mahallâtından Sirkeci mahallesinde bundan akdem fevt olan merhûm Abdi Çelebi b. Mehmed’in eytâm-ı sıgārına vasiyy-i şer‘î olan Abdülganî b. Abdi nâm hasm-ı câhid mahzarında, müteveffâ-yı mezbûrun zevcesi ve vârisi olan hâmiletü hâze’l-kitâb Rahime Hâtun bt. Hasan’dan sâdır olan da‘vâ-yı sahîha-i şer‘iyyede gıbbe’l-istişhâd şöyle şehâdet ettiler ki müdde‘iye-i mezbûrenin müteveffâ-yı merkūmun zimmetinde nikâhında ma‘kūdun-aleyh olan mehr-i müecceli cihetinden râyicü’l-vakt bin akçe hakkı vardır. Müdde‘iye-i merkūme meblağ-ı mezbûru kısmen veya tamâmen almadığına, hibe etmediğine, bi vechin mine’l-vücûh ve sebebin mine’l-esbâb zimmetini ibrâ etmediğine dâir yemîn billâh ettikden sonra ve şâhidlerin şehâdetlerinin ba‘de ri‘âyeti şerâiti’l-kabûl inde’ş-şer‘ makbûl ve mu‘teber olmasından sonra mûcebince hükm edildi. Cerâ zâlike hurrire fi’l-yevmi’s-sâlis ve’l-ışrîn min şehri Şevvâli’l-mükerrem sene 1005. Şuhûd: Es-Sâbikūn