Galata Mahkemesi 20 Numaralı Sicil (H. 1005 - 1007 / M. 1596 - 1599) cilt: 35, sayfa: 185 Hüküm no: 204 Orijinal metin no: [29b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mîrî esirlerden Frenk asıllı İstefani’nin azat edildiği Tersâne-i âmire reislerinden olup mîrî üserâ ahvâline memûr olan fahrü’l-akrân Kurd Reis b. Abdülmennân nâm kimesne mîrî üserâdan orta boylu açık kaşlı elâ gözlü Efrenciyyü’l-asl İstefani v. Habuni nâm esîr ile meclis-i şer‘-i kavîme hâzır olup takrîr-i kelâm edip mezbûr İstefani mîrî üserâdan olup hizmet-i pâdişâhîyi istikāmetle edâ eyleyip kadîmü’l-eyyâmdan bu âna gelince tersâne-i âmire’de istikāmeten hizmet eylediği mukābelede vezîr-i a‘zâm İbrahim Paşa hazretleri sene erba‘ ve elf Şa‘bân-ı mu‘azzamı’nın ibtidâsından beş yıla dek tersâne-i âmire’de hizmet eyleyip ba‘dehû âzâd olsun deyû mühürlü tezkire vermiş idi nazar olunup hizmet-i mezbûreyi edâ eyledikden sonra tezkire mûcebince âzâd olunmasına kıbel-i şer‘den dahi temessük verilmesin taleb ederim deyû takrîr-i meşrûhuna muvâfık olan tezkire-i mezbûreyi ibrâz eylemeğin mûcebince li ecli’t-temessük işbu kitâb tahrîr olunup yedine vaz‘ olundu ki ba‘de’l-edâi hizmeti’l-mezbûr esîr-i mezbûra kimesne mâni‘ olmaya. Tahrîren fî evâsıtı Rebî‘ilevvel sene sitte ve elf. Şuhûd: Süleyman [b.] Mehmed ve Mustafa b. Rüstem, el-Hâc Hasan b. Şaban, Hasan [b.] Abdullah, Mehmed [b.] Yusuf ve gayruhüm