Galata Mahkemesi 20 Numaralı Sicil (H. 1005 - 1007 / M. 1596 - 1599) cilt: 35, sayfa: 189 Hüküm no: 208 Orijinal metin no: [30b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mushaf-ı şerîf davasında sulh olunduğu Mahmiye-i Galata müzâfâtından kasaba-i Kasımpaşa’da Câmi‘-i şerîf mahallesinden olup bundan akdem vefât eden Mehmed Reis’in veresesinden vâlidesi Kamer Hâtun kız karındaşı Âişe Hâtun meclis-i şer‘-i şerîfde müteveffâ-yı mezbûrun diğer kız karındaşı hâmiletü hâze’l-kitâb Fâtıma Hâtun bt. Mehmed mahzarında ikrâr ve takrîr-i merâm kılıp mûrisimiz müteveffâ-yı mezbûrun muhallefâtından bin akçe kıymetli kıt‘ası büyük bir Mushaf-ı şerîf kabz eyleyip sâir muhallefâtı ile bey‘ olunmağı taleb eylediğimizde babam mezbûr Mehmed Reis hâl-i hayâtında beni hocaya verdikde Mushaf-ı mezbûru iştirâ eyleyip bana temlîk eyleyip ben dahi kabz eyleyip Kur’ân-ı azîm üzerinden [bundan] akdem mülk-i sarîhim olmağın vermezim deyû cevâb vermiş idi hakīkatü’l-hâl minvâl-i meşrûh üzre idiği bize dahi ilm gelmeğin Mushaf-ı şerîf-i mezbûra müte‘allik cemî‘-i de‘âvî ve mütâlebâtdan fâriğler olup Mushaf-ı mezbûrdan iskāt-ı hak eyledik min ba‘d husûs-ı mezbûra müte‘allik taleb ve da‘vâ edersek istimâ‘ olunmaya dedikde mezbûrları ikrâr-ı meşrûhlarında mezbûre Fâtıma vicâhen ve şifâhen tasdîk ettikden sonra mâ hüve’l-vâki‘ bi’t-taleb kayd olundu. Tahrîren fî evâhiri Rebî‘ilâhir sene sitte ve elf. Şuhûd: Behram Ağa b. Abdullah, Haydar b. Abdullah, Musli Reis, Mustafa el-Muhzır, Hasan b. Rıdv[an]