Galata Mahkemesi 20 Numaralı Sicil (H. 1005 - 1007 / M. 1596 - 1599) cilt: 35, sayfa: 193 Hüküm no: 214 Orijinal metin no: [32a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kamer Hatun’un evdeki hissesinin tespiti Bundan akdem kasaba-i Kasımpaşa’da Câmi‘-i Kebîr mahallesinde vefât edip verâseti kızları Âişe ve Fâtıma ve oğlu Mehmed’e ve zevcesi Kamer Hâtun’a münhasıra olan Mehmed Bey b. Ömer nâm topçunun muhallefâtından mahalle-i mezbûrede vâki‘ ma‘lûmü’l-hudûd olup on dokuz bin üç yüz akçeye takvîm olunan menzilinden oğlu mezbûr Mehmed Çelebi’nin hissesine yedi bin sekiz yüz akçe düşüp mezbûre Kamer’e beş bin akçe düşüp mâ‘adâsı zikr olunan kızların olup iştirâk üzre tasarruf olunurken mezbûr Mehmed Çelebi dahi vefât edicek verâseti sagīre kızları Belkıs ve Rahime kız karındaşları mezbûretân Âişe ve Fâtıma’ya ve anası mezbûre Kamer’e ve zevcesi Âişe’ye münhasıra olmağla müteveffâ-yı mezbûrun menzil-i merkūmda olan yedi bin sekiz yüz akçe hisseden mezbûre Kamer’e bin iki yüz elli akçe düşüp beş bin akçe dahi kızlara düşüp sekiz yüz akçe dahi zevcesi mezbûre Âişe’ye düşüp mâ‘adâsı mezbûretân Âişe ve Fâtıma’nın hakkı olup ba‘de küllî hesâb mezbûre Kamer Hâtun’un menzil-i merkūmda altı bin iki yüz elli akçe hissesi mütehakkik olduğunu sâir verese tasdîk edicek mâ hüve’l-vâki‘ bi’t-taleb sebt olundu. Fi’t-târihi’l-mezbûr. Şuhûd: Behram Ağa, Mustafa Reis, Bayram Sofu [b.] Mustafa, el-Hâc Hasan [b.] Şaban, Hasan Çelebi Takyeci ve gayruhüm