Galata Mahkemesi 20 Numaralı Sicil (H. 1005 - 1007 / M. 1596 - 1599) cilt: 35, sayfa: 211 Hüküm no: 234 Orijinal metin no: [36a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fahri Hatun’un vasiyetinin hukuka aykırı şekilde tenfiz edildiği Bundan akdem mahmiye-i Galata kazâsına tâbi‘ kasaba-i Kasımpaşa’da merhûm Surûrî Efendi mahallesinde vefât edip verâseti sadriye kızı Âişe ve li eb kız karındaşı Zeyni ve Aynî ve li eb karındaşı Mustafa’ya münhasıra olan Fahri Hâtun’un merkūme Âişe ve Aynî tarafından husûs-ı âti’z-zikre nehc-i şer‘î üzre vekâleti sâbite olan ebnâ-i sipâhiyândan Hasıroğlu demekle ma‘rûf olan fahrü’l-akrân Mehmed Bey nâm cündî meclis-i şer‘-i şerîfeye Ebûbekir b. Ahmed ve mahalle-i mezbûre imâmı olan Ahmed Halîfe’yi ihzâr ve mahzarlarında bi’l-vekâle takrîr-i da‘vâ edip mezbûre Fahri Hâtun maraz-ı mevtinde sülüs vasiyyet eyleyip nice müslümanları işhâd eyleyip vefât eyledikden sonra mezbûr Ebûbekir mezbûre Fahri Hâtun tenfîz-i vesâyâsına beni vasiyy-i muhtâr eyledi deyû izn-i şer‘-i şerîf yoğiken imâm-ı mezbûr ile cümle muhallefâtını kabz eyleyip fuzûlen bey‘ eyleyip muhallefâtından nice esbâbı hilâf-ı şer‘-i şerîf mâbeynlerinde [36b] tevzî‘ ve taksîm edip ve nicesin ketm ve nicesin gabn-i fâhiş ile üzerlerine alıp vârisleri olan müvekkilelerime ve hakkullah olan sülüse gadr etmişlerdir, mezbûrların elinde olan defterler ahz olunup muktezâ-yı şer‘-i şerîf üzre kitâb ve hesâb olunup hakk-ı müstahakku’l-a‘yân olunmasın taleb ederim dedikden sonra mezbûr Ebûbekir’e suâl olundukda mezbûre Fahri fi’l-hakīka maraz-ı mevtinde sülüs vasiyyet eyleyip tenfîz-i vesâyâsına beni vasî etmeğin muhallefâtına vaz‘-ı yed eyleyip imâm-ı mezbûr ile sattık, lâkin kayd-ı şer‘îsin kassâma haber vermedik na-meşrû‘ eyledik lâkin kabahat eyledik deyû cevâb verip mezbûr imâm dahi fi’l-hakīka kassâma haber vermedik sattık deyû mezbûr dahi hilâf-ı şer‘-i şerîf vaz‘ eylediğine mu‘terif oldukdan sonra mezbûrların defterlerine nazar olunup hesâb olundukda nice esbâbın akçelerin bel‘ ve ketm eyleyip nice vücûh ile mezbûrların te‘addî ve hıyâneti zuhûr eyleyip kendiler dahi bi’t-tav‘ hıyânet ve te‘addîlerine mu‘terif oldukda vâki‘ hâl mezbûr Mehmed Bey talebi ile kayd olundu. Cerâ zâlike ve hurrire fî evâili Cumâdelûlâ sene sitte ve elf. Şuhûdü’l-hâl: Abdülbâkī Çelebi b. Mehmed er-Reisü’s-sultânî, Musli Çelebi el-Hammâmî er-Râcil, el-Hâc Hasan Reisü’l-hayyat, Hüsrev b. Abdullah, el-Hâc Hasan el-Bezzâzî, el-Hâc Mustafa ve gayruhüm