Galata Mahkemesi 20 Numaralı Sicil (H. 1005 - 1007 / M. 1596 - 1599) cilt: 35, sayfa: 212 Hüküm no: 237 Orijinal metin no: [37a-1, Arapça] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İsmihan Hatun’un Gürcü asıllı câriyesini vasiyet yoluyla azat ettiği Mustafa Çelebi b. Muharrem ve Tesbihcizâde demekle ma‘rûf Mehmed Çelebi b. Mahmud ve Hüseyin b. Mehmed nâm kimesneler meclis-i şer‘-i şerîfe hâzırûn olup, Ebî Eyyûb-i Ensârî mahallâtından Takyecibaşı mahallesinde bundan akdem vefât eden İsmihan Hâtun bt. İlyas’ın kız karındaşı ve vârisi olan yine mahalle-i mezbûrede sâkine Hatice Hâtun bt. İlyas nâm hasm-ı câhid mahzarında, orta boylu, açık kaşlı, elâ gözlü, Gürciyyetü’l-asl hâmiletü hâze’l-kitâb Âlemşah bt. Abdullah’dan sâdır olan da‘vâ-yı sahîha-i şer‘iyyede gıbbe’l-istişhâd şöyle şehâdet ettiler ki müdde‘iye-i mezkûre müteveffât-ı merkūmenin taht-ı mülkünde iken müteveffât-ı merkūme hâl-i hayâtı ve kemâl-i akl ve sıhhatinde kendisini mutlak tedbîr ile tedbîr eyledi. Mevlâ-yı mezkûresi ölüp rabbine kavuştuğunda câriye-i mesfûre sâir harâir-i asliyyât gibi hürre oldu. Şehâdetleri ba‘de ri‘âyeti şerâiti’l-kabûl inde’ş-şer‘ makbûl ve mu‘teber olmağın mûcebince hürriyetine hükm edildi. Vaka‘a’t-tahrîr ve’l-işhâd fî evâili Cumâdelûlâ sene sitte ve elf. Şuhûdü’l-hâl: Ali Bey el-Mütevellî, İbrahim Çelebi Kâtib-i Eyüb, Mehmed b. Sinan Kâtib-i Eyüb, Mehmed Çelebi Kâtib-i Eyüb, Keyvan b. Abdullah er-Râcil, …? b. Hasan, Şehsüvar b. Mehmed