İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 409 Hüküm no: 497 Orijinal metin no: [209-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Desterecilerbaşı’nda Ekmekçi Manas’ın, tablakârı Luyan’da olan alacağı için kefil alınmadan serbest bırakılmaması Tablakârın kefil alınmayınca sebîli tahliye olunmaya Ma‘rûz, Desterecilerbaşı’nda ekmekçi olup arzuhâl eden Manas meclis-i şer‘-i hatîrde arzuhâlinde mezkûr mukaddemen tablakârı Luyan zimmî muvâcehesinde merkūm Luyan zimmetinde nân-ı azîz semeninden olan sekiz yüz guruş hakkımı işbu yetmiş dokuz senesi Rebî‘ülâhiri’nin on ikinci günü beher şehr tamâmında on guruş vermek üzere seksen ay tamâmına dek lede’l-murâfa‘a tecîl edip işbu Şevvâl-i şerîf gurresine gelince mukassat-ı merkūmu almış idim. Hâlâ merkūm Luyon firâr etmek murâd etmekle işbu yedimde olan fetvâ-yı şerîfe mûcebince bana kefil versin deyü ba‘de’d-da‘vâ ve’l-ikrâr ber-mûceb-i fetvâ-yı şerîfe merkūm Luyan’ın kefili alınmak re’y-i hâkime müfevvez olmağın kefili alınmak şer‘an re’y olunmağla kefili alınınca[alınmayınca] sebîli tahliye olunmamak iktizâ eylediği bi’l-iltimâs huzûr-ı âlîlerine i‘lâm olundu. Fî 18 min-Şevvâl sene 1179.