İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 412 Hüküm no: 501 Orijinal metin no: [211-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bakkal Yorgi, Bakkal Kosta ve Matyoz’un bakkal esnaflığından ihraç olunmaları Bakkāl esnâfından ihrâc Ma‘rûz Mahmiye-i İslambol’da Bakkāl esnâfından olup arzuhâl edenlerden İsmail Çelebi derûn-ı arzuhâlde isimleri terkīm olunup meclis-i şer‘-i şerîfe ihzâr etdirdikleri Çukurbostan karşısında Bakkāl Yorgi v. Rizo ve Parmakkapı’da Bakkāl Kosta v. İskoli’den merkūmân Kosta ve Yorgi Cüceçeşmesi’nde bakkāl olan gāib ani’l-meclis Matyoz zimmî ile yekdil olup zikr olunan Parmakkapı’da vâki‘ nısf gediğimi bi-gayrı hakkın âhara verdiler deyü da‘vâ ve yine esnâf-ı mezkûreden Ali Beşe nâm kimesne merkūmûn için Darbhâne kurbünde vâki‘ dükkânıma mechûlü’l-ahvâl zimmîler iskân ve an-kasdin kefil olup onlar dahi bazergândan nes’eten zehâir iştirâ ve bahalarını vermeyip firâr etmeleriyle merkūmûn kefâletlerini inkâr ve bazergânları iğrâ etkmekle dükkân sâhibidir deyü bizden tazmîn eylediler deyü iddi‘â ve yine esnâf-ı mezbûreden Kasımpaşa’da Kulaksız’da bakkāl Hıristo merkūmûndan taht-ı icâremde olan dükkân gediğine fuzûlî kendi âdemlerini iskân ve hâsıl olan fâizi bana vermeyip fuzûlî zabt ve istihlâk eylediler deyü teşekkî eylediklerinden mâ‘adâ esnâf-ı mezkûre Pazarbaşısı el-Hâc Mehmed ve Yiğitbaşıları Ahmed ve Bölükbaşıları Ali ve ehl-i İslâm ustalarından el-Hâc Ahmed ve Molla Mustafa ve el-Hâc Halil ve es-Seyyid Süleyman ve diğer Ali ve diğer el-Hâc Ali ve diğer Ali Beşe ve Osman ve diğer Osman Beşe ve Musa ve Abdurrahman ile zimmî ustalarından isimleri terkīm olunan otuz nefer zimmîler merkūmûn için kendi hâllerinde olmayıp bâlâda iddi‘â olunan mevâd vâkı‘a mutâbık olduğundan gayrı bakkāllardan bir kimesne hâlik oldukda öteden beri nizâmımız mazbûtü’l-hâl ve bazergân malını itlâf ve izâ‘at etmez kefil olacağımız bir ustayı cümlemiz ma‘rifetiyle dükkâna iskân iken mesfûrlar kendülerine tâbi‘ ba‘zı Rum keferesiyle ittifâk ve meçhûlü’l-ahvâl mellâ‘îni bu misillü dükkânlara geçirip hem nizâmımızı muhtel ve nâssa dahi mazarrâtları mütehakkık olmağla hattâ bu esnâda Galata’da bir dükkân sâhibi zimmî hâlik olmağla dükkânı voyvoda ve kassâm taraflarından mühürlü iken mührünü fek ve içine âdemlerini iskâna cesâret edip dâimâ bu misillü hareket ve ızrâr âdet-i müstemirreleri olup te’dîben içimizden ihrâc ile şer ve mazarrâtları def‘ olunmak bâbında fermân-ı âlîşân sudûrunu istid‘â ederiz deyü takrîr ve teşekkîleri iltimâslarıyla huzûr-ı âlîlerine i‘lâm olundu. Fî 20 min-Şevvâl sene 1179.